ضلع مہمند کے تھانہ پنڈیالی کی حدود میں واقع علاقے دویزی انزری میاں گان میں پولیس اور سی ٹی ڈی نے عسکریت پسندوں کے خلاف ایک کامیاب سرچ اینڈ ٹارگٹڈ آپریشن کیا۔ اس دوران پولیس اور سی ٹی ڈی اہلکاروں نے غیر معمولی جرات، بہادری اور پیشہ ورانہ صلاحیتوں کا شاندار مظاہرہ کیا۔

ڈی پی او مہمند اکرام اللہ (PSP) نے فرنٹ لائن پر رہتے ہوئے خود صبح سے شام تک آپریشن کی نگرانی کی۔ آپریشن میں ایس پی کاؤنٹر ٹیررازم ڈیپارٹمنٹ (CTD) قاضی عصمت، ڈی ایس پی سرکل پنڈیالی دلاور شاہ، ایس ایچ او تھانہ پنڈیالی، ایلیٹ فورس، سی ٹی ڈی اہلکاروں اور دیگر پولیس جوانوں نے بھرپور شرکت کی۔

عسکریت پسندوں نے پولیس پارٹی پر بزدلانہ فائرنگ کی، تاہم پولیس جوانوں نے فوری اور بھرپور جوابی کارروائی کرتے ہوئے عسکریت پسندوں کو منہ توڑ جواب دیا، جس کے نتیجے میں ملزمان میدان چھوڑ کر فرار ہونے پر مجبور ہوگئے۔ ان کے ٹھکانوں کو بھی مسمار کر دیا گیا۔ آپریشن کے بعد علاقے کو پولیس نے گھیرے میں لے کر کلیئر کر دیا ہے اور مزید سرچ آپریشن جاری ہے تاکہ علاقے میں مکمل امن یقینی بنایا جا سکے۔