خاتون سے زیادتی کے الزام میں پی سی بی نے معطل کر رکھا ہے پولیس نے دو ہفتے بعد طلب کر لیا
مانچسٹر ۔ قومی کرکٹر حیدر علی کی مانچسٹر میں گرفتاری کے بعد ضمانت پر رہائی ہو گئی، ان پر خاتون سے مبینہ زیادتی کا الزام ہے۔ پولیس نے حیدر علی کو 2 ہفتے بعد دوبارہ طلب کیا ہے جبکہ ان کے برطانیہ چھوڑنے پر پابندی عائد ہے۔ واقعہ پاکستان شاہینز کرکٹ ٹیم کے حالیہ دورہ انگلینڈ کے دوران پیش آیا۔ دوسری جانب پاکستان کرکٹ بورڈ نے کرکٹر حیدر علی کو معطل کر دیا، بورڈ کے مطابق حیدر کو قانونی مددفراہم کی جائے گی۔ پی سی بی نے بتایا ہے کہ حیدر علی کے خلاف قانونی کارروائی مکمل ہونے کے بعد انضباطی کارروائی پر غور ہو۔
گریٹر مانچسٹر پولیس نے کرکٹر حیدر علی سے متعلق تفصیلات جاری کر دیں۔ مانچسٹر پولیس کے مطابق 14 اگست کو جنسی زیادتی کی شکایت موصول ہوئی اور زیادتی کا واقعہ مبینہ طور پر 23 جولائی کو مانچسٹر کی حدود میں پیش آیا۔ پولیس کا کہنا ہے کہ واقعے کے الزام میں 24 سال کے نوجوان کو گرفتار کیا گیا اور واقعے کی تحقیقات مکمل ہونے تک ملزم کو ضمانت پر رہا کیا گیا۔ خیال رہے کہ گزشتہ روز خبر سامنے آئی کہ خاتون سے مبینہ زیادتی کے الزام میں پاکستانی کرکٹر حیدر علی کی مانچسٹر میں گرفتاری کے بعد ضمانت پر رہا کیا گیا۔
