راولپنڈی میں شادی شدہ خاتون غیرت کے نام پر قتل جرگہ کے فیصلے پر سدرہ کو کشمیر سے واپس لا کر گلہ گھونٹ دیا گیا، قبر کا نشان بھی مٹا دیا

راولپنڈی۔ بلوچستان کے ڈیگاری دہرے قتل کے بعد راولپنڈی کے علاقے پیرودھائی میں بھی ایک افسوسناک واقعہ سامنے آگیا، جہاں پسند کی شادی کرنے والی نوجوان لڑکی سدرہ کو مبینہ طور پر جرگے کے فیصلے پر گلا گھونٹ کر قتل کر دیا گیا۔ پولیس کے مطابق واردات 17 جولائی کو ہوئی۔ سدرہ کو اس کی پسند کی شادی پر شدید دباؤ کا سامنا تھا۔ وہ کشمیر فرار ہو گئی تھی لیکن بعد میں اسے واپس لا کر قتل کیا گیا۔ مقتولہ کو خاموشی سے رات کے اندھیرے میں دفنا دیا گیا اور اس کی قبر کا نشان بھی مٹا دیا گیا تا کہ شواہد چھپائے جاسکیں۔ پولیس ذرائع کے مطابق واقعے میں قبرستان کمیٹی کے سابق چیئر مین اور گورکن کو گرفتار کر لیا گیا ہے۔ پولیس کے مطابق سدرہ کے شوہر ضیاء الرحمان کی مدعیت میں ایک مقدمہ درج کیا گیا۔ جس میں مقتولہ سدرہ پر زیورات اور نقدی لے کر فرار ہونے کا الزام لگایا گیا ہے۔ ایف آئی آر میں لڑکی پر عثمان نامی لڑکے کے ساتھ بھاگ جانے کا الزام بھی لگایا گیا۔ اب پولیس نے عدالت سے مقتولہ کی قبر کشائی کی اجازت طلب کی ہے تا کہ قتل کی تصدیق اور شواہد حاصل کیے جاسکیں۔ ذرائع کے مطابق عدالت نے قبر کشائی کے حوالے سے فیصلہ آج سنانے کاعندیہ دے دیا ہے۔ معاملے کی مزید تفتیش جاری ہے۔