قمر باجوہ سے صرف سلام دعا ہوئی، نفرتیں ختم ہونی چاہئیں؛ پی ٹی آئی کسی ادارے سے محاذ آرائی نہیں چاہتی: بیرسٹر گوہر

اسلام آباد / راولپنڈی (حسبان میڈیا ڈیسک): پاکستان تحریک انصاف (پی ٹی آئی) کے چیئرمین بیرسٹر گوہر علی خان نے واضح کیا ہے کہ ایک شادی کی تقریب میں سابق آرمی چیف جنرل (ر) قمر جاوید باجوہ سے ان کی صرف ہیلو ہائے اور سلام دعا ہوئی ہے۔ ان کا کہنا تھا کہ وقت کے ساتھ دشمنی دوستی میں اور دوستی دشمنی میں بدل سکتی ہے، اس لیے اب نفرتیں ختم ہونی چاہئیں۔

راولپنڈی اڈیالہ روڈ پر ذرائع ابلاغ کے نمائندوں سے گفتگو کرتے ہوئے بیرسٹر گوہر نے سابق آرمی چیف سے ملاقات سے متعلق خبروں کو اپنے خلاف پروپیگنڈا قرار دے کر اس کی شدید مذمت کی۔ انہوں نے دو ٹوک الفاظ میں کہا کہ پی ٹی آئی کسی بھی ادارے سے محاذ آرائی نہیں چاہتی، تاہم ہر ادارے کے سربراہ کو اپنی آئینی حدود میں رہنا چاہیے۔

بلدیاتی انتخابات اور اپوزیشن اتحاد:
چیئرمین پی ٹی آئی نے بلدیاتی انتخابات کے بائیکاٹ کا امکان مسترد کرتے ہوئے اعلان کیا کہ پی ٹی آئی دیگر جماعتوں کی طرح بھرپور طریقے سے انتخابی میدان میں اترے گی، اور اس ضمن میں اسلام آباد کے تین حلقوں کے لیے امیدواروں کو کاغذاتِ نامزدگی تیار کرنے کی ہدایت جاری کر دی گئی ہے۔

جمعیت علمائے اسلام (ف) کے سربراہ مولانا فضل الرحمان سے روابط پر گفتگو کرتے ہوئے بیرسٹر گوہر نے بتایا کہ ان سے ملاقاتیں آل پارٹیز کانفرنس کے سلسلے میں ہوئی ہیں اور مشترکہ مسائل پر دونوں جماعتیں اکٹھی ہو سکتی ہیں، البتہ مشترکہ تحریک کی بات کرنا ابھی قبل از وقت ہے۔

بانی پی ٹی آئی کی صحت اور حکومتی رابطے:
جیل میں ملاقاتوں سے متعلق اسلام آباد ہائی کورٹ کے حکم کا خیرمقدم کرتے ہوئے بیرسٹر گوہر نے کہا کہ گزشتہ دو سال سے عدالتی احکامات پر عملدرآمد نہیں ہو رہا، امید ہے اس مرتبہ حکم پر عمل ہوگا۔ انہوں نے کہا کہ ملاقاتوں پر پابندی سے سیاسی کشیدگی میں اضافہ ہوا، جبکہ بیرسٹر سلمان صفدر نے ملاقات کے بعد بانی پی ٹی آئی عمران خان کی صحت سے متعلق جو خبر دی وہ حوصلہ افزا نہیں تھی۔ انہوں نے سپریم کورٹ کے 18 اگست کے حکم پر فوری عملدرآمد کا مطالبہ بھی کیا۔

حکومت سے مذاکرات کے سوال پر ان کا کہنا تھا کہ حکومت اور وزیرِ داخلہ سے رابطہ ضرور رہتا ہے، تاہم اس وقت نہ تو باضابطہ مذاکرات ہو رہے ہیں اور نہ ہی پسِ پردہ کوئی بات چیت جاری ہے، البتہ سیاسی کشیدگی کم کرنے کے لیے بات چیت ناگزیر ہے۔

خیبر پختونخوا کی صورتحال:
خیبر پختونخوا کے معاملات پر تبصرہ کرتے ہوئے بیرسٹر گوہر نے کہا کہ گورنر راج یا ایمرجنسی کسی بھی صورت جمہوری حکومت کا متبادل نہیں ہو سکتے۔ انہوں نے صوبے میں گورنر راج کے خاتمے کا مطالبہ کرتے ہوئے خبردار کیا کہ عوام کے احتجاج کے لیے باہر نہ نکلنے سے یہ نتیجہ اخذ نہیں کرنا چاہیے کہ عوام کا غصہ ختم ہو گیا ہے۔