ڈی آر کانگو: بزدلی، بغاوت اور احکامات سے انکار پر 66 فوجیوں کو سزائے موت کا حکم

کنشاسا (حسبان میڈیا ڈیسک): ڈیموکریٹک ریپبلک آف کانگو (ڈی آر کانگو) کی ایک فوجی عدالت نے میدانِ جنگ میں بزدلی دکھانے، بغاوت کرنے اور اعلیٰ حکام کے احکامات ماننے سے انکار کے سنگین جرائم میں کم از کم 66 فوجی اہلکاروں کو سزائے موت سنا دی ہے۔

بین الاقوامی ذرائع ابلاغ کے مطابق یہ سزائیں مشرقی ڈی آر کانگو کے شورش زدہ صوبے شمالی کیوو کے علاقے والی کالی میں قائم ایک فوجی عدالت نے مجموعی طور پر 71 فوجیوں کے مقدمے کی سماعت مکمل ہونے کے بعد سنائیں۔ عدالتی کارروائی کے دوران ٹھوس شواہد کی بنیاد پر 66 اہلکاروں کو سزائے موت کا حکم دیا گیا، ایک فوجی کو 10 سال قید کی سزا سنائی گئی، جبکہ چار فوجیوں کو عدم ثبوت کی بنا پر باعزت بری کر دیا گیا۔

فوجی حکام کے مطابق ان اہلکاروں کو 20 اکتوبر کو والی کالی کے محاذ سے اس وقت گرفتار کیا گیا تھا جب انہوں نے باغی اتحاد فرنٹ فار دی ری فاؤنڈیشن آف دی نیشن (ایف آر این) کے جنگجوؤں کے ساتھ شدید جھڑپوں کے دوران اپنے مورچے چھوڑ دیے تھے اور میدانِ جنگ سے فرار ہو گئے تھے۔ واضح رہے کہ ایف آر این، ایم 23 (M23) سمیت کئی مسلح باغی گروہوں پر مشتمل ایک طاقتور اتحاد ہے جس کے خلاف سرکاری افواج برسرِ پیکار ہیں۔

عسکری حکام کا مؤقف ہے کہ اس کڑے ٹرائل کا بنیادی مقصد دہائیوں سے خانہ جنگی کا شکار مشرقی خطے میں لڑنے والی افواج کے اندر نظم و ضبط کو برقرار رکھنا ہے۔ اس سے قبل گزشتہ ماہ بھی اسی نوعیت کے الزامات کے تحت فرنٹ لائن سے پیچھے ہٹنے والے 27 فوجیوں کو سزائے موت سنائی گئی تھی۔

یاد رہے کہ ڈی آر کانگو کی حکومت نے مارچ 2024 میں سزائے موت پر عائد 20 سالہ پابندی ختم کرتے ہوئے واضح کیا تھا کہ فوج کے اندر موجود غداروں اور محاذ سے فرار ہونے والے عناصر کو کیفرِ کردار تک پہنچانا ناگزیر ہو چکا ہے، جس کے بعد سے عسکری عدالتوں کی جانب سے ایسے سخت ترین فیصلے سامنے آ رہے ہیں۔