وفاقی حکومت کا تاریخی اقدام: آئین کے آرٹیکل 164 کے تحت صوبوں کے این ایف سی حصے سے 35 ارب روپے کی کٹوتی

اسلام آباد (حسبان میڈیا ڈیسک): ملکی معاشی و آئینی تاریخ میں پہلی مرتبہ وفاقی حکومت نے آئینِ پاکستان 1973ء کے آرٹیکل 164 کو بروئے کار لاتے ہوئے چاروں صوبوں کے قومی مالیاتی کمیشن (این ایف سی) کے حصے سے گرانٹ کی مد میں تقریباً 35 ارب روپے وصول کر لیے ہیں۔

روزنامہ دی نیوز کی رپورٹ کے مطابق وزارتِ خزانہ کے اعلیٰ حکام نے اس پیشرفت کی باضابطہ تصدیق کرتے ہوئے بتایا ہے کہ وفاقی حکومت نے رواں مالی سال کے ابتدائی دو ماہ کے دوران صوبوں سے 34 ارب 83 کروڑ 90 لاکھ روپے (34.839 ارب روپے) بطور گرانٹ حاصل کیے ہیں۔ وزارتِ خزانہ کے دستاویزات میں اس خطیر رقم کو وفاق کے نان ٹیکس ریونیو (این ٹی آر) کے کھاتے میں ظاہر کیا گیا ہے۔

ذرائع کے مطابق یہ اقدام بین الاقوامی مالیاتی فنڈ (آئی ایم ایف) کے 7 ارب ڈالر کے قرض پروگرام کی شرائط اور اہداف کو پورا کرنے کے سلسلے کی ایک کڑی ہے۔ مالی سال 2026-27 کا وفاقی بجٹ پیش کیے جانے سے قبل وفاقی حکومت اور چاروں صوبائی حکومتوں کے مابین ایک اہم مالیاتی مفاہمت طے پائی تھی۔

اس معاہدے کے تحت صوبوں نے اس بات پر اتفاق کیا تھا کہ وہ رواں مالی سال 2026-27 کے دوران وفاقی حکومت کی مالی ذمہ داریوں کو پورا کرنے اور بجٹ خسارے پر قابو پانے میں معاونت کے لیے اپنے این ایف سی شیئر سے مجموعی طور پر 1035 ارب روپے بطور گرانٹ وفاق کو فراہم کریں گے۔ معاشی ماہرین کے مطابق آئین کے آرٹیکل 164 کا یہ استعمال وفاق اور صوبوں کے درمیان مالیاتی وسائل کی تقسیم کے حوالے سے ایک نئی مثال قائم کر رہا ہے۔