حکومت طلبہ اور اساتذہ کو اکٹھا ہونے سے روک رہی ہے، انتقامی کارروائیوں سے موقف تبدیل نہیں ہوگا: مولانا فضل الرحمن

اسلام آباد (رپورٹ: حسبان میڈیا): جمعیت علمائے اسلام (ف) کے سربراہ مولانا فضل الرحمن نے حکومت پر کڑی تنقید کرتے ہوئے الزام عائد کیا ہے کہ موجودہ حکمران اپنے اقدامات اور طرزِ عمل سے عوام میں شدید نفرت پیدا کر رہے ہیں۔ انہوں نے کہا کہ احتساب کے نام پر سیاسی اراکین کے خلاف صرف انتقامی کارروائیاں کی جا رہی ہیں اور کردار کشی کے لیے مختلف نوٹس اچھالے جا رہے ہیں، لیکن ایسے دباؤ کے ذریعے ان کی آواز اور اصولی موقف کو ہرگز تبدیل نہیں کیا جا سکتا۔

قومی تعلیمی کانفرنس سے خطاب کرتے ہوئے جے یو آئی (ف) کے سربراہ نے حکومت کی تعلیمی و انتظامی پالیسیوں پر گہرے تحفظات کا اظہار کیا۔ انہوں نے مؤقف اختیار کیا کہ حکومت نے طلبہ، اساتذہ اور دینی مدارس کو اجتماعات منعقد کرنے سے روک کر تعلیم، طالب علم اور استاد کے حوالے سے اپنی علم دشمن سوچ واضح کر دی ہے۔ کانفرنس کے دوران انہوں نے سوال اٹھایا کہ ملک میں پالیسیاں کون بنا رہا ہے اور یہ فیصلے کس کی ایما پر کیے جا رہے ہیں؟ حکمرانوں کو سوچنا چاہیے کہ ان اقدامات کا رخ پورے ملکی نظام کی تباہی کی طرف بھی ہو سکتا ہے۔

مولانا فضل الرحمن نے اپنی 34 سالہ سیاسی زندگی کا حوالہ دیتے ہوئے کہا کہ انہوں نے اس طویل عرصے میں کبھی کسی عدالت میں کرپشن کے مقدمے کا سامنا نہیں کیا، بلکہ صرف ختم نبوت کے معاملے پر ایک مرتبہ عدالت گئے۔ انہوں نے شکوہ کیا کہ میڈیا پر ایسا تاثر دیا جا رہا ہے جیسے وہ بہت بڑے بدعنوان ہوں، لہٰذا میڈیا کو ان کا اصل مؤقف بھی عوام کے سامنے پیش کرنا چاہیے۔ انہوں نے دعویٰ کیا کہ مقدمات، سزاؤں اور قید کا سامنا کرنے والے بعض افراد وفاداری تبدیل کرتے ہی تمام الزامات سے بری الذمہ ہو جاتے ہیں۔ انہوں نے واضح کیا کہ ان کے خاندان، جماعت کے اہم عہدیداروں اور کاروباری ساتھیوں پر دباؤ ڈالا جا رہا ہے، لیکن وہ ایسے ہتھکنڈوں سے مرعوب ہوئے بغیر اپنے حق کی آواز بلند کرتے رہیں گے۔