حسبان میڈیا (ویب ڈیسک): صدر مملکت آصف علی زرداری اور وزیراعظم شہباز شریف نے یومِ دفاع و شہداء کے موقع پر اپنے الگ الگ پیغامات میں 6 ستمبر کو پاکستان کی تاریخ کا ایک اہم اور ناقابلِ فراموش دن قرار دیتے ہوئے مسلح افواج کے شہداء، غازیوں اور ان کے اہلخانہ کو زبردست خراجِ عقیدت پیش کیا ہے۔
صدر مملکت آصف علی زرداری نے اپنے پیغام میں کہا کہ یومِ دفاع ہمیں آزادی، خودمختاری اور ملکی سلامتی کے تحفظ کے لیے دی جانے والی عظیم قربانیوں کی یاد دلاتا ہے۔ 1965ء کی جنگ میں پاکستانی قوم اور مسلح افواج نے اتحاد، جرات اور فرض شناسی کا مظاہرہ کرتے ہوئے دشمن کے عزائم کو ناکام بنایا، جبکہ شہداء نے اپنے لہو سے حب الوطنی اور شجاعت کی ایسی مثالیں قائم کیں جو ہمیشہ یاد رکھی جائیں گی۔
انہوں نے کہا کہ 6 ستمبر 1965ء کو قوم اور مسلح افواج کا مثالی اتحاد پاکستان کی اجتماعی طاقت کا واضح ثبوت تھا۔ متحد قوم کے عزم کو دنیا کی کوئی طاقت شکست نہیں دے سکتی۔ صدر کے مطابق اسی جذبے کی جھلک حالیہ معرکۂ حق میں بھی دیکھنے کو ملی، جہاں آپریشن بنیان مرصوص کی کامیابی نے قومی تاریخ میں ایک اور قابلِ فخر باب کا اضافہ کیا۔
آصف علی زرداری کا کہنا تھا کہ معرکۂ حق میں کامیابی پاک فوج کی پیشہ ورانہ صلاحیت، غیر متزلزل عزم، حوصلے اور بہادری کے ساتھ ساتھ عوام اور مسلح افواج کے درمیان مضبوط تعلق کا مظہر ہے۔ انہوں نے کہا کہ روایتی اور غیر روایتی خطرات کے مقابلے میں مسلح افواج نے ہر موقع پر بھرپور تیاری اور پیشہ ورانہ استعداد کا ثبوت دیا ہے اور قوم آج بھی اپنے بہادر محافظوں کے ساتھ کھڑی ہے۔
صدر مملکت نے کہا کہ پاکستان خطے اور دنیا میں امن، بات چیت اور باہمی احترام کے فروغ کے لیے اپنا کردار جاری رکھے گا۔ ان کے مطابق علاقائی امن و سلامتی کے لیے پاکستان کی ذمہ دارانہ کوششیں اس کے بڑھتے ہوئے کردار کی عکاس ہیں، جبکہ مکہ معاہدہ اجتماعی سلامتی اور علاقائی امن کے لیے پاکستان کی اہمیت کو مزید اجاگر کرتا ہے۔
انہوں نے واضح کیا کہ پاکستان اپنی خودمختاری، علاقائی سالمیت اور قومی سلامتی کے تحفظ پر کسی قسم کا سمجھوتہ نہیں کرے گا۔ آصف علی زرداری نے کہا کہ مسئلہ کشمیر کے منصفانہ حل کے بغیر جنوبی ایشیا میں پائیدار امن کا قیام ممکن نہیں، جبکہ بھارت کو پاکستان کے خلاف پراکسی عناصر کے ذریعے دہشت گردی کی سرپرستی سے باز آنا ہوگا۔
صدر مملکت نے مزید کہا کہ مضبوط دفاع کے ساتھ معاشی استحکام اور ترقی بھی قومی طاقت کے بنیادی ستون ہیں۔ نوجوان نسل کے لیے محفوظ، خوشحال اور ترقی یافتہ پاکستان کی تعمیر پوری قوم کی مشترکہ ذمہ داری ہے۔
وزیراعظم شہباز شریف نے یومِ دفاع و شہداء کے موقع پر اپنے پیغام میں کہا کہ 6 ستمبر قومی تاریخ کا ایسا روشن باب ہے جو مسلح افواج اور پاکستانی قوم کے غیر معمولی اتحاد، عزم اور قربانیوں کی یاد دلاتا ہے۔
انہوں نے کہا کہ یہ دن ملک کے لیے جانیں قربان کرنے والے شہداء، غازیوں اور ان کے خاندانوں کو خراجِ عقیدت پیش کرنے کا اہم موقع ہے۔ 1965ء میں دشمن کی جارحیت کا مسلح افواج نے ہر محاذ پر بھرپور مقابلہ کیا اور اپنی پیشہ ورانہ صلاحیتوں کا لوہا منوایا، جبکہ پاکستانی قوم نے اتحاد، حوصلے اور ثابت قدمی سے دشمن کے عزائم کو ناکام بنانے میں اپنا کردار ادا کیا۔
شہباز شریف نے کہا کہ حالیہ معرکۂ حق میں پاک فوج نے دشمن کو ایسا مؤثر جواب دیا جسے تاریخ میں یاد رکھا جائے گا۔ آپریشن بنیان مرصوص کی کامیابی نے ایک مرتبہ پھر ثابت کیا کہ پاکستان کی مسلح افواج ملکی دفاع اور قومی سلامتی کے لیے ہر وقت تیار ہیں۔ ان کے مطابق 6 ستمبر کا جذبہ آج بھی قوم کے اندر پوری قوت کے ساتھ موجود ہے۔
وزیراعظم نے کہا کہ موجودہ حالات میں قومی اتحاد اور یکجہتی پہلے سے کہیں زیادہ ضروری ہے۔ دشمن قوتیں مختلف ہتھکنڈوں اور ہائبرڈ جنگ کے ذریعے پاکستان کو کمزور اور غیر مستحکم کرنے کی کوششیں کر رہی ہیں، تاہم قوم متحد ہو کر ان سازشوں کو ناکام بنائے گی۔
انہوں نے کہا کہ پاکستان کو درپیش بڑے چیلنجز میں جہالت، غربت اور پسماندگی کا خاتمہ شامل ہے۔ ملک کو قائداعظم محمد علی جناحؒ اور علامہ محمد اقبالؒ کے تصور کے مطابق ایک متحد، پُرامن، مستحکم اور معاشی طور پر مضبوط ریاست بنانا ہوگا۔
شہباز شریف کے مطابق حکومت قومی سلامتی، خودمختاری اور دفاع کو مزید مضبوط بنانے کے لیے پرعزم ہے، جبکہ معاشی ترقی، سیاسی استحکام اور عوامی فلاح و بہبود بھی حکومت کی اہم ترجیحات میں شامل ہیں۔
وزیراعظم نے کہا کہ پاکستان علاقائی اور عالمی امن کے لیے تعمیری کردار ادا کرتا رہے گا اور تنازعات کے حل کے لیے مذاکرات، تعاون اور باہمی احترام کو ترجیح دی جائے گی۔ ان کے مطابق مکہ مشترکہ دفاعی معاہدہ علاقائی سلامتی اور اجتماعی دفاع کے حوالے سے پاکستان کے بڑھتے ہوئے کردار کا مظہر ہے۔
انہوں نے کہا کہ مسئلہ کشمیر کے منصفانہ اور پائیدار حل کے بغیر جنوبی ایشیا میں حقیقی اور دیرپا امن قائم نہیں ہوسکتا۔ بھارت کی جانب سے مسئلہ کشمیر کے حل میں رکاوٹیں خطے میں پائیدار امن کی راہ میں بڑی رکاوٹ ہیں۔
وزیراعظم شہباز شریف نے قوم پر زور دیا کہ ایمان، اتحاد اور نظم و ضبط کے اصولوں کو اپنی زندگی کا حصہ بنانے کے عزم کی تجدید کی جائے۔ انہوں نے کہا کہ مضبوط اور خوشحال پاکستان کے لیے ہر شہری کو اپنا کردار ادا کرنا ہوگا، کیونکہ مضبوط دفاع ہی پائیدار امن، استحکام اور ترقی کی بنیاد ہے۔
وزیراعظم نے مسلح افواج کو قومی سلامتی کا ضامن قرار دیتے ہوئے کہا کہ پوری قوم اپنے بہادر محافظوں کے شانہ بشانہ کھڑی ہے۔ انہوں نے شہداء کے درجات کی بلندی، پاکستان کے امن، استحکام اور خوشحالی کے لیے دعا کرتے ہوئے اپنے پیغام کا اختتام مسلح افواج زندہ باد، پاکستان پائندہ باد کے الفاظ سے کیا۔
