خیبر پختونخوا کے ضلع مانسہرہ کی مشہور اور دشوار گزار چوٹی 'موسیٰ کا مصلیٰ' سے واپسی کے دوران آئرلینڈ سے تعلق رکھنے والا ایک غیر ملکی سیاح پراسرار طور پر لاپتا ہو گیا ہے۔ مقامی انتظامیہ اور پولیس نے لاپتا سیاح کی تلاش کے لیے گہرے کھائیوں اور ناہموار راستوں پر بڑے پیمانے پر سرچ آپریشن کا آغاز کر دیا ہے۔

پولیس حکام کے مطابق، آئرلینڈ کا شہری "الیگزینڈر" اپنے ایک اور غیر ملکی دوست کے ہمراہ مانسہرہ کی 13 ہزار 500 فٹ بلند ترین چوٹی 'موسیٰ کا مصلیٰ' کی سیر کے لیے گیا تھا۔ پولیس کے مطابق، دونوں غیر ملکی سیاحوں نے مروجہ قوانین کی خلاف ورزی کی اور متعلقہ اداروں سے کوئی نو آبجیکشن سرٹیفکیٹ (NOC) حاصل کیے بغیر ہی اتنی بلند اور خطرناک چوٹی پر مہم جوئی کے لیے روانہ ہو گئے تھے۔

ابتدائی تحقیقات میں یہ حیرت انگیز انکشاف ہوا ہے کہ چوٹی سر کرنے کے بعد واپسی کے سفر کے دوران دونوں غیر ملکی دوستوں نے ایک دوسرے سے پہلے نیچے پہنچنے کی انوکھی شرط لگائی، جس کے بعد دونوں نے الگ الگ راستوں کا انتخاب کیا۔ شرط کے مطابق ایک سیاح تو بحفاظت نیچے پہنچنے میں کامیاب رہا، تاہم الیگزینڈر راستے میں ہی کہیں لاپتا ہو گیا۔ ضلعی انتظامیہ، پولیس اور مقامی گائیڈز پر مشتمل سرچ ٹیمیں شدید موسمی حالات کے باوجود لاپتا آئرش سیاح کی کھوج لگانے میں مصروف ہیں۔