حسبان میڈیا (ویب ڈیسک): پاکستان نے سعودی عرب کے ساتھ اپنے معاشی روابط کو مزید وسعت دینے اور موجودہ تعاون کو اسٹریٹجک اقتصادی شراکت داری میں تبدیل کرنے کی خواہش کا اظہار کردیا ہے۔
وزیراعظم شہباز شریف سے سعودی پاک بزنس کونسل کے چیئرمین شہزادہ منصور نے اسلام آباد میں ملاقات کی، جس میں دونوں ممالک کے درمیان تجارت، سرمایہ کاری اور اقتصادی تعاون کے فروغ سے متعلق مختلف امور پر تفصیلی تبادلہ خیال کیا گیا۔
ملاقات کے دوران وزیراعظم شہباز شریف نے کہا کہ پاکستان اور سعودی عرب کے درمیان حکومتی سطح کے ساتھ ساتھ نجی شعبے کے باہمی تعاون کو مزید مضبوط بنانے کے لیے موجودہ وقت انتہائی موزوں ہے۔
انہوں نے کہا کہ دونوں ممالک کے کاروباری حلقوں کے درمیان روابط بڑھانے اور مشترکہ منصوبوں کو آگے بڑھانے سے دوطرفہ اقتصادی تعلقات کو نئی بلندیوں تک پہنچایا جاسکتا ہے۔
دوسری جانب سعودی پاک بزنس کونسل کے چیئرمین شہزادہ منصور نے پاکستان میں مختلف شعبوں میں سرمایہ کاری میں دلچسپی کا اظہار کیا۔ انہوں نے بالخصوص زراعت، بندرگاہوں اور شاہراہوں کے شعبوں میں سرمایہ کاری کے امکانات کا جائزہ لینے کی خواہش ظاہر کی۔
شہزادہ منصور نے پاکستان کے ساتھ تجارتی اور کاروباری روابط مزید بڑھانے میں سعودی حکومت اور سعودی کاروباری برادری کی دلچسپی کا بھی اعادہ کیا۔
ملاقات کو دونوں ممالک کے درمیان معاشی تعاون کے نئے مواقع پیدا کرنے کی جانب اہم پیش رفت قرار دیا جارہا ہے، جبکہ سرمایہ کاری کے ممکنہ منصوبوں سے پاکستان اور سعودی عرب کے دیرینہ تعلقات کو اقتصادی شراکت داری میں مزید تبدیل کرنے کی راہ ہموار ہونے کی توقع ہے۔
