پشاور  : خیبر پختونخوا میں ڈینگی وائرس کے کیسز میں مسلسل اور تشویشناک اضافہ ریکارڈ کیا گیا ہے، جہاں گزشتہ ہفتے کے 289 کیسز سے بڑھ کر رواں ہفتے مجموعی تعداد 339 تک پہنچ گئی ہے۔ محکمہ صحت کی جانب سے جاری کردہ تازہ ترین رپورٹ کے مطابق، صوبے بھر میں رواں ہفتے ڈینگی کے مزید 50 نئے کیسز سامنے آئے ہیں۔ صورتحال سے نمٹنے کے لیے محکمہ صحت نے مچھروں کی افزائش روکنے اور اسپرے (Larvicidals) مہم سمیت اپنی انسدادی سرگرمیاں مزید تیز کر دی ہیں اور متاثرہ علاقوں میں اضافی عملہ تعینات کر دیا گیا ہے۔

رپورٹ کے مطابق، مچھروں کی افزائش کے سدِباب کے لیے اب تک صوبے کے 551 گھروں، 1 ہزار 280 پانی کے برتنوں اور 247 کھلی جگہوں سے ڈینگی کا لاروا باقاعدہ تلف کیا جا چکا ہے۔ اس کے علاوہ، عوام الناس میں اس وائرس سے بچاؤ اور احتیاطی تدابیر سے متعلق شعور بیدار کرنے کے لیے 87 ہزار سے زائد خصوصی آگاہی سیشنز منعقد کیے جا چکے ہیں۔ ان معلوماتی سیشنز میں 2 لاکھ 54 ہزار 116 خواتین ورکرز کو بھی خصوصی تربیت فراہم کی گئی ہے، جو خواتین گھر گھر جا کر شہریوں کو کھلے برتنوں میں پانی ذخیرہ کرنے کے خطرات اور مچھروں سے بچاؤ کی تدابیر سے آگاہ کر رہی ہیں۔

محکمہ صحت کے جاری کردہ تازہ ترین اعداد و شمار کے مطابق، صوبائی دارالحکومت پشاور 152 کیسز کے ساتھ صوبے کا سب سے زیادہ متاثرہ ضلع بن چکا ہے۔ دیگر اضلاع میں کوہاٹ 85 کیسز کے ساتھ دوسرے، بنوں 19 کیسز کے ساتھ تیسرے اور ہری پور 17 کیسز کے ساتھ چوتھے نمبر پر ہے۔ اگر صرف رواں ہفتے کی بات کی جائے تو پشاور میں ڈینگی کے 13 اور کوہاٹ میں 16 نئے کیسز سامنے آئے ہیں، جس نے مقامی انتظامیہ کو ہائی الرٹ پر رہنے پر مجبور کر دیا ہے۔