پشاور: صوبائی دارالحکومت پشاور میں امن و امان کی دگرگوں صورتحال اور سٹریٹ کرائم کی بڑھتی ہوئی لہر نے ایک اور معصوم جان نگل لی ہے۔ پشاور کے نواح میں رکشہ چھیننے کی مبینہ کوشش کے دوران شدید مزاحمت کرنے پر نامعلوم سفاک ملزمان نے میٹرک کے 17 سالہ طالب علم اور حافظِ قرآن، محمد بلال کو بے دردی سے قتل کر دیا۔ پولیس نے واقعے کا مقدمہ درج کر کے لرزہ خیز واردات کی مختلف زاویوں سے اعلیٰ سطحی تحقیقات کا آغاز کر دیا ہے۔

مقامی پولیس اور خاندانی ذرائع کے مطابق، مقتول حافظ محمد بلال میٹرک کا طالب علم تھا جو اپنے گھر کے مالی اخراجات میں ہاتھ بٹانے کے لیے روزانہ شام کے وقت رکشہ چلا کر مزدوری کیا کرتا تھا۔ روزمرہ کی طرح گذشتہ شام بھی وہ رکشہ لے کر گھر سے نکلا تھا، تاہم رات گئے تک واپس نہ پہنچنے پر اہل خانہ تشویش میں مبتلا ہو گئے اور انہوں نے اپنے طور پر بلال کی تلاش شروع کی، جس کے بعد اس کی لاش برآمد ہوئی۔

ابتدائی تفتشی رپورٹ کے مطابق، حافظ بلال اپنی آخری سواری اتارنے کے بعد گھر واپس لوٹ رہا تھا کہ سنسان راستے کا فائدہ اٹھاتے ہوئے نامعلوم اسٹریٹ کرمنلز نے اسے روک لیا۔ ملزمان نے اسلحے کے زور پر رکشہ چھیننے کی کوشش کی، تاہم نوعمر بلال کی جانب سے سخت مزاحمت پر ملزمان نے اسے بدترین تشدد کا نشانہ بنایا اور بعد ازاں گلے میں پھندا ڈال کر اسے موت کے گھاٹ اتار دیا۔ ملزمان مقتول کا رکشہ لے کر جائے وقوعہ سے باآسانی فرار ہونے میں کامیاب ہو گئے۔

مقتول حافظ بلال کے سوگوار والد نے نم آلود آنکھوں کے ساتھ میڈیا کو بتایا کہ ان کے خاندان کی کسی کے ساتھ کوئی ذاتی دشمنی یا عناد نہیں تھا۔ ان کا بیٹا صرف پڑھائی اور حلال روزی کمانے میں مگن رہتا تھا۔ پشاور پولیس کے اعلیٰ حکام کا کہنا ہے کہ جائے وقوعہ سے شواہد اکٹھے کر لیے گئے ہیں اور اردگرد کے علاقوں کی جیو فینسنگ سمیت سی سی ٹی وی کیمروں کی مدد سے سفاک ملزمان کی گرفتاری کے لیے چھاپے مارے جا رہے ہیں۔