اسلام آباد :  سابق وزیراعلیٰ پنجاب اور وزیراعظم شہباز شریف کے صاحبزادے حمزہ شہباز نے وزیراعظم ہاؤس میں باقاعدہ طور پر اپنا دفتر سنبھال لیا ہے۔ پارٹی ذرائع سے موصول ہونے والی اطلاعات کے مطابق حمزہ شہباز وزیراعظم ہاؤس کے چھٹے فلور پر قائم دفتر سے اپنے سیاسی و انتظامی امور سرانجام دیں گے اور وہ سوموار سے باقاعدہ طور پر دفتری معاملات کی نگرانی کا آغاز کریں گے۔

ذرائع کا کہنا ہے کہ حمزہ شہباز نے گزشتہ روز ہی وزیراعظم ہاؤس میں مختلف وفاقی وزراء سے اہم ملاقاتیں کیں، جن میں ملکی سیاسی صورتحال اور مستقبل کی حکمتِ عملی پر تبادلہ خیال کیا گیا۔ پارٹی کے اندرونی ذرائع نے تصدیق کی ہے کہ حمزہ شہباز کو وفاق میں اہم ذمہ داریاں سونپی جا رہی ہیں، جن کے تحت وہ پبلک اکاؤنٹس کمیٹی (PAC) کے معاملات کو بھی براہِ راست دیکھیں گے۔

اس کے علاوہ، مسلم لیگ (ن) کے کارکنان کے دیرینہ مسائل کو ترجیحی بنیادوں پر حل کرنے کے لیے حمزہ شہباز کی نگرانی میں ایک خصوصی کمیٹی بھی تشکیل دی جائے گی۔ سیاسی ماہرین کا ماننا ہے کہ حمزہ شہباز کی وزیراعظم ہاؤس میں اس فعال آمد سے وفاقی حکومت کی سیاسی پوزیشن اور پارٹی کارکنوں کے ساتھ رابطوں میں مزید مضبوطی آئے گی۔