مشرقِ وسطیٰ میں کشیدگی ایک بار پھر شدت اختیار کر گئی ہے جب لبنان سے اسرائیل کے فوجی مراکز کو نشانہ بنانے کا دعویٰ سامنے آیا ہے۔ حزب اللہ کے مطابق اس کارروائی میں اسرائیلی فوج کے اہم ہیڈکوارٹرز کو نشانہ بنایا گیا جس کے نتیجے میں جانی و مالی نقصان ہوا ہے۔

عالمی میڈیا رپورٹس کے مطابق اسرائیلی حکام نے بھی حملے کی تصدیق کرتے ہوئے بتایا ہے کہ اس واقعے میں کم از کم 16 افراد زخمی ہوئے ہیں۔ زخمیوں کو فوری طور پر قریبی اسپتالوں میں منتقل کر دیا گیا جہاں انہیں طبی امداد فراہم کی جا رہی ہے۔

اسرائیلی حکام نے زخمی ہونے والوں کے بارے میں مزید تفصیلات جاری نہیں کیں اور نہ ہی یہ واضح کیا کہ حملہ کن مخصوص مقامات پر کیا گیا تھا۔

دوسری جانب حزب اللہ کا کہنا ہے کہ اس نے اسرائیلی فوج کے ہوم فرنٹ کمانڈ کے مرکزی ہیڈکوارٹر کو نشانہ بنایا جو رملہ میں واقع ریحعام بیس کے نام سے جانا جاتا ہے۔ تنظیم کے مطابق اس کارروائی کے دوران ایک سیٹلائٹ مواصلاتی مرکز کو بھی ہدف بنایا گیا جو بیت شیمش کے علاقے ہائیلا میں واقع ہے۔

اسی دوران ایران کی جانب سے بھی اسرائیل کے وسطی علاقوں پر حملے کی اطلاعات سامنے آئی ہیں۔ رپورٹس کے مطابق اس حملے میں کلسٹر میزائل استعمال کیے گئے جس کے نتیجے میں ایک شخص ہلاک جبکہ چار دیگر زخمی ہو گئے۔

خطے میں یکے بعد دیگرے ہونے والی ان کارروائیوں کے بعد مشرقِ وسطیٰ میں کشیدگی مزید بڑھنے کا خدشہ ظاہر کیا جا رہا ہے اور عالمی برادری صورتحال پر گہری نظر رکھے ہوئے ہے۔