اسلام آباد ۔ فن لینڈ نے آپریشنل اور سٹرٹیجک وجوہات کی بنا پر پاکستان افغانستان اور میانمار میں اپنے سفارتخانوں کو بند کرنے کا فیصلہ کیا ہے۔
فن لینڈ کی وزارت خارجہ نے ایک بیان میں کہا کہ وزارت خارجہ نے اسلام آباد کابل اور یانگون میں فن لینڈ کے سفارتخانوں کو 2026 میں بند کرنے کا فیصلہ کیا ہے۔ بیان میں مزید کہا گیا کہ سفارتخانے آپریشنل اور اسٹرٹیجک وجوہات کی بناء پر بند کیے جارہے ہیں جو متعلقہ ممالک کی سیاسی صورتحال میں تبدیلیوں اور فن لینڈ کے ساتھ محدود تجارتی واقتصادی تعلقات سے جڑی ہوئی ہیں۔
وزارت نے بتایا کہ تینوں ممالک میں سفارتخانوں کی بندش کی تیاری پہلے ہی شروع کر دی گئی تھی یہ مشن 2026 کے دوران بند کر دیئے جائیں گے۔ یہ اقدام فن لینڈ کے سفارتی مشنز کے نیٹ ورک کے اسٹرٹیجک جائزے کا حصہ ہے۔
بیان کے مطابق، اس میں فن لینڈ کی خارجہ و سلامتی پالیسی کے مفادات اور اس کی برآمدات کے فروغ کی ضروریات کو مد نظر رکھا گیا جس کا مقصد یہ ہے کہ وسائل کو ان ممالک پر مرکوز کیا جائے جو فن لینڈ کے لیے تزویراتی طور پر زیادہ اہم ہیں۔
