لیبیا کے ساحلی شہر الخمس کے قریب 95 غیر قانونی تارکین وطن کو لے جانے والی دو کشتیاں الٹ گئیں۔

حکام کے مطابق ایک کشتی میں بنگلہ دیش سے تعلق رکھنے والے 26 تارکین وطن سوار تھے جن میں سے چار کی موت ہو گئی۔

دوسری کشتی میں مصری اور سوڈانی تارکین سمیت 69 تارکین وطن سوار تھے۔ لیبیا کے کوسٹ گارڈ کے مطابق 91 تارکین وطن کو بچا لیا گیا۔

لیبیا حالیہ برسوں میں بحیرہ روم عبور کر کے یورپ جانے کی کوشش کرنے والے افریقی اور ایشیائی تارکین وطن کے لیے ایک اہم کراسنگ پوائنٹ بن گیا ہے، جہاں خستہ حال کشتیوں میں سمندر عبور کرنے کی کوششیں اکثر مہلک ثابت ہوتی ہیں۔