عبدالغفار
راولپنڈی – پاکستان اور بنگلہ دیش کے درمیان چیمپیئنز ٹرافی 2025 کا گروپ میچ مسلسل بارش کی نذر ہو گیا۔ خراب موسم کے باعث ٹاس بھی ممکن نہ ہو سکا، اور آخرکار امپائرز نے میچ منسوخ کرنے کا اعلان کر دیا۔ دونوں ٹیموں کو ایک، ایک پوائنٹ دے دیا گیا۔
پاکستانی ٹیم پہلے ہی چیمپیئنز ٹرافی کے سیمی فائنل کی دوڑ سے باہر ہو چکی تھی، کیونکہ اسے نیوزی لینڈ اور بھارت کے خلاف شکست کا سامنا کرنا پڑا تھا۔ اس میچ کا نتیجہ پاکستان کی پوزیشن پر اثرانداز نہیں ہو سکتا تھا، تاہم گرین شرٹس کے لیے یہ میچ وقار بچانے کا موقع تھا جو بارش کی نذر ہو گیا۔
پاکستان کو اپنے ابتدائی دونوں میچز میں ناکامی کا سامنا کرنا پڑا، جہاں بیٹنگ، باؤلنگ اور فیلڈنگ میں ٹیم کی مجموعی کارکردگی غیر تسلی بخش رہی۔ بلے باز بڑی پارٹنرشپس بنانے میں ناکام رہے، جبکہ باؤلرز بھی وکٹیں لینے میں زیادہ کامیاب نہ ہو سکے۔
سابق کرکٹرز اور ماہرین کے مطابق پاکستان ٹیم کو اپنی خامیوں پر کام کرنے کی اشد ضرورت ہے۔ کوچنگ، کھلاڑیوں کی فٹنس اور ٹیم سلیکشن میں بہتری نہ لائی گئی تو مستقبل میں بھی ٹیم کو ایسے نتائج کا سامنا کرنا پڑ سکتا ہے۔
میچ دیکھنے کے لیے بڑی تعداد میں شائقین اسٹیڈیم پہنچے تھے، مگر بارش نے ان کی امیدوں پر پانی پھیر دیا۔ بارش کے باعث کئی گھنٹے انتظار کے بعد میچ کو باضابطہ طور پر ختم کر دیا گیا۔
پاکستان کرکٹ بورڈ (PCB) کے حکام نے بھی اس صورتحال پر افسوس کا اظہار کیا، جبکہ کرکٹ فینز نے امید ظاہر کی کہ آنے والے ایونٹس میں ٹیم بہتر کارکردگی پیش کرےگی۔
چیمپیئنز ٹرافی کے سیمی فائنلز میں بھارت اورنیوزی لینڈ، کی ٹیمیں پہنچ چکی ہیں۔ پاکستان کرکٹ ٹیم کو اب اگلی سیریز کے لیے اپنی خامیوں کو دور کرنے پر توجہ دینا ہوگی تاکہ مستقبل میں بہتر نتائج حاصل کیے جا سکیں۔
