ڈیجیٹل خیبرپختونخوا، عمران خان اور علی امین گنڈاپور کے وژن کی عملی تعبیر ہے، نوجوانوں کو عالمی معیار کی ٹیکنالوجی سے لیس کریں گے، معاون خصوصی برائے سائنس و ٹیکنالوجی ڈاکٹر شفقت ایاز
وزیراعلیٰ خیبرپختونخوا کے معاونِ خصوصی برائے سائنس و انفارمیشن ٹیکنالوجی ڈاکٹر شفقت ایاز نے کہا ہے کہ نوجوانوں کو جدید ٹیکنالوجی، ڈیجیٹل اسکلز اور عالمی معیار کی سہولیات فراہم کرنا بانی پاکستان تحریک انصاف عمران خان اور وزیراعلیٰ خیبرپختونخوا علی امین گنڈاپور کے وژن کی اصل روح ہے۔ یہی وہ وژن ہے جس کے تحت خیبرپختونخوا کو ایک جدید، شفاف اور ڈیجیٹل صوبہ بنایا جا رہا ہے۔ان خیالات کا اظہارانہوں نے آج ملاکنڈ درگئی میں FIMS کالج آف نرسنگ اینڈ ہیلتھ سائنسز میں جدید کمپیوٹر لیب کے افتتاح کے موقع پر کیا، جہاں بطور مہمانِ خصوصی انہوں نے Apple iMac Systems پر مشتمل لیب کا افتتاح کیا۔ اس جدید سہولت سے طلبہ کو نہ صرف کمپیوٹر ایجوکیشن اور ریسرچ میں مدد ملے گی بلکہ ڈیجیٹل مارکیٹ میں شمولیت اور نئی جدتوں سے بھی براہِ راست فائدہ اٹھا سکیں گے۔ڈاکٹر شفقت ایاز نے کہا کہ نوجوانوں کو وہ مواقع فراہم کیے جارہے ہیں جن سے وہ نوکری کے متلاشی نہیں بلکہ نوکری دینے والے بنیں۔ اسی وژن کو آگے بڑھاتے ہوئے وزیراعلیٰ خیبرپختونخوانے یہ واضح کر دیا ہے کہ صوبے کو ٹیکنالوجی کے میدان میں ملک کے دیگر صوبوں سے آگے لے جانا ہے۔انہوں نے کہا کہ خیبرپختونخوا حکومت سائنس و انفارمیشن ٹیکنالوجی کے شعبے کو ترقی دے کر تعلیم، صحت، روزگار اور گورننس کے تمام شعبوں میں شفافیت اور معیار لانے کے لیے پرعزم ہے۔ ای-گورننس، ای-لرننگ، اسکل ڈویلپمنٹ، آئی ٹی زونز اور جدید ڈیجیٹل پراجیکٹس اسی وژن کی عملی مثالیں ہیں۔ڈاکٹر شفقت ایاز نے کہا کہ خیبرپختونخوا کے نوجوان مہارت، ذہانت اور محنت میں کسی سے کم نہیں ہیں، ضرورت صرف اس بات کی ہے کہ انہیں جدید سہولیات اور عالمی معیار کی ٹیکنالوجی تک رسائی دی جائے۔ ایسے اقدامات نہ صرف صوبے کے تعلیمی معیار کو بہتر بنائیں گے بلکہ پاکستان کے لیے بھی ایک روشن مستقبل کی بنیاد رکھیں گے۔انہوں نے امید ظاہر کی کہ خیبرپختونخوا کا ہر نوجوان ڈیجیٹل دنیا میں اپنی جگہ بنائے گا اور“ڈیجیٹل خیبرپختونخوا”کے خواب کو حقیقت میں بدلنے میں اپنا کردار ادا کرے گا۔
