وزیر اعظم شہباز شریف قطر سے اظہار یکجہتی کے لیے وفد کے ہمراہ دوحہ پہنچے۔ دوحہ ایئرپورٹ پر قطر کے نائب وزیر اعظم و وزیر مملکت برائے دفاع شیخ سعود بن عبدالرحمان بن حسن الثانی نے شہباز شریف کا استقبال کیا۔
شہباز شریف کے ہمراہ نائب وزیر اعظم و وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات و نشریات عطا اللہ تارڑ اور معاون خصوصی طارق فاطمی بھی دوحہ پہنچے۔
ترجمان دفتر خارجہ کے مطابق وزیر اعظم شہباز شریف قطر پر اسرائیلی جارحیت کے تناظر میں امیر قطر شیخ تمیم بن حماد الثانی، قطری شاہی خاندان اور قطری عوام سے یکجہتی کے لیے دوحہ پہنچے ہیں۔
انہوں نے کہا کہ وزیر اعظم شہباز شریف دوحہ میں قطری امیر شیخ تمیم بن حماد الثانی سے ملاقات کریں گے۔ اور دوران ملاقات دوحہ پر بلاجواز اسرائیلی جارحیت اور بین الاقوامی قوانین کے صریح منافی حملے کے تناظر میں قطری امیر اور قطری عوام سے یکجہتی کا اظہار کریں گے۔
ملاقات میں اسرائیل کے خطے کے مختلف ممالک پر بلاجواز حملوں اور مسلسل جارحیت کے ساتھ خطے میں امن کے قیام کے لیے مشاورت ہو گی۔
