چین کے دارلحکومت بیجنگ میں واقع شہر باوڈنگ میں 24 گھنٹوں کے دوران سال بھر جتنی بارش ریکارڈ کی گئی ہے۔
چینی محکمہ موسمیات کے مطابق باوڈنگ کے ضلع یی کاؤنٹی میں 447.4 ملی میٹر بارش ہوئی، جو سالانہ اوسط بارش 500 ملی میٹر کے برابر ہے، ژوژو شہر سمیت کئی علاقوں میں سڑکیں، پل اور دیگر انفرااسٹرکچر زیر آب آ گئے، جبکہ ہزاروں افراد کو ہنگامی طور پر محفوظ مقامات پر منتقل کیا گیا۔
چائنا میٹرولوجیکل ایڈمنسٹریشن (سی ایم اے) کے مطابق اب تک 6,171 گھروں کے 19,453 افراد کو نکالا جا چکا ہے۔ سوشل میڈیا پر سامنے آنے والی ویڈیوز میں پولیس اہلکاروں کو گھٹنوں تک پانی میں لوگوں کو نکالتے ہوئے دیکھا گیا۔
ماہرین موسمیات کے مطابق 2020 کے بعد سے بارشوں کی مقدار مسلسل بلند ہو رہی ہے، جو شمالی چین کے موسمیاتی پیٹرن میں واضح تبدیلی کی علامت ہے۔
محکمہ موسمیات نے اس بارش کو 2023 کے تباہ کن طوفان سے تشبیہ دی ہے، جس نے بیجنگ اور اطراف کے علاقوں میں غیر معمولی سیلابی صورتحال پیدا کی تھی۔ ژوژو، جو اُس وقت بھی شدید متاثر ہوا تھا، ایک بار پھر بیرونی دنیا سے کٹ گیا ہے کیونکہ اہم پل اور سڑکیں پانی میں ڈوب چکی ہیں۔
