خیبر پختونخوا میں ایمرجنسی کے نفاذ یا گورنر راج کے آپشن پر غور کیلئے وزیراعظم ہاس میں کل اعلی سطح اجلاس طلب کر لیا گیا۔ خیبر پختونخوا کی صورتحال کے حوالے سے اہم فیصلوں کے لیے کل وزیراعظم ہاس میں اعلی سطح کا اجلاس طلب کیے جانے کی اطلاعات ہیں۔ذرائع کے مطابق اجلاس میں صوبے کی موجودہ صورتحال، عوام کے تحفظ اور امن و امان سے متعلق امور کا تفصیلی جائزہ لیا جائے گا، جبکہ ایمرجنسی کے نفاذ اور گورنر راج سمیت مختلف آئینی آپشنز پر غور متوقع ہے۔
اِسی طرح ذرائع کا کہنا ہے کہ خیبر پختونخوا کے 12 اضلاع، بشمول سابق قبائلی علاقوں (سابق فاٹا)، میں ایمرجنسی نافذ کرنے کی تجویز زیر غور ہے۔ اس تجویز کا مقصد متعلقہ علاقوں میں عوام کے تحفظ اور امن و امان کی صورتحال کو بہتر بنانے کے لیے اقدامات کرنا بتایا جا رہا ہے۔اجلاس میں قومی سلامتی کے اداروں کی جانب سے موصول ہونے والی رپورٹس کا بھی جائزہ لیا جائے گا، صوبے کی صورتحال پر غور کے بعد اہم اختیارات وفاقی حکومت کے استعمال میں دینے سے متعلق تجاویز کا بھی جائزہ لیا جا سکتا ہے۔