اسلام آباد: وزیراعظم محمد شہباز شریف نے نیویارک پہنچنے کے بعد امیر جماعت اسلامی حافظ نعیم الرحمن سے ٹیلیفون پر رابطہ کرکے اسلام آباد کی جانب جاری احتجاجی مارچ چند روز کے لیے مؤخر کرنے کی درخواست کردی، تاہم جماعت اسلامی نے پٹرولیم لیوی کے خاتمے کے مطالبے سے پیچھے نہ ہٹنے کا مؤقف برقرار رکھا ہے۔

ذرائع کے مطابق وزیراعظم نے ملتان میں موجود حافظ نعیم الرحمن سے گفتگو کے دوران کہا کہ حکومت نے عوام کو ریلیف دینے کے لیے پیکیج کا اعلان کیا ہے اور وہ وطن واپسی پر امیر جماعت اسلامی سے ملاقات کرکے مزید اقدامات پر بھی بات چیت کرنا چاہتے ہیں۔

حافظ نعیم الرحمن نے وزیراعظم کو آگاہ کیا کہ جماعت اسلامی موجودہ حکومتی ریلیف پیکیج کو اپنے مطالبات کے مطابق کافی نہیں سمجھتی اور پٹرولیم لیوی کے مکمل خاتمے تک احتجاجی جدوجہد جاری رکھنے کے مؤقف پر قائم ہے۔

امیر جماعت اسلامی نے کہا کہ ان کی جماعت گزشتہ کئی ہفتوں سے پٹرولیم لیوی کے خلاف احتجاج کررہی ہے اور اس معاملے پر اپنے مطالبے سے دستبردار نہیں ہوگی۔ تاہم وزیراعظم کی جانب سے مارچ مؤخر کرنے کی درخواست پر جماعت کی قیادت سے مشاورت کے بعد حتمی فیصلہ کیا جائے گا۔

جماعت اسلامی کے مطابق قیادت کی مشاورت کے بعد آئندہ کے لائحہ عمل کا اعلان کیا جائے گا، جبکہ احتجاج کے بنیادی مطالبے میں پٹرولیم لیوی کا خاتمہ شامل ہے۔

جماعت اسلامی نے پٹرولیم مصنوعات کی قیمتوں میں اضافے اور پٹرولیم لیوی کے خلاف کراچی سے اسلام آباد کی جانب احتجاجی مارچ کا آغاز کیا ہے۔ 20 ستمبر کو کراچی سے ٹرین کے ذریعے روانہ ہونے والا مارچ بعد ازاں سندھ کے مختلف شہروں سے ہوتا ہوا ملتان پہنچا۔

دوسری جانب حکومت نے پٹرولیم مصنوعات کی قیمتوں میں اضافے کے اثرات کم کرنے کے لیے مختلف طبقات کو مالی ریلیف دینے کی اسکیم کا اعلان کیا ہے۔ جماعت اسلامی کا مؤقف ہے کہ اس کے بنیادی مطالبے کے حل کے بغیر احتجاج ختم نہیں کیا جائے گا۔