حسبان میڈیا (ویب ڈیسک): ایشین گیمز کے ہاکی مقابلوں میں پاکستان نے فاتحانہ آغاز کرتے ہوئے تھائی لینڈ کو یکطرفہ مقابلے کے بعد 0-9 سے شکست دے دی، ندیم احمد نے شاندار کھیل پیش کرتے ہوئے ہیٹ ٹرک مکمل کی۔

جاپان کے شہر ناگویا کے گرین اسٹیڈیم میں کھیلے گئے میچ میں پاکستانی ٹیم نے آغاز ہی سے جارحانہ انداز اپنایا اور تھائی لینڈ کو دفاعی دباؤ میں رکھا۔

پاکستان نے پہلے کوارٹر میں 2 گول کرکے برتری حاصل کی۔ معین شکیل اور عماد بٹ نے ایک، ایک گول اسکور کیا، جس کے بعد پاکستانی ٹیم نے دوسرے کوارٹر میں بھی حملوں کا سلسلہ جاری رکھا۔

دوسرے کوارٹر میں ندیم احمد نے ایک جبکہ سفیان خان نے 2 گول کرکے پاکستان کی برتری مزید مستحکم کردی۔

تیسرے کوارٹر میں پاکستانی کھلاڑیوں نے مزید تیز رفتاری سے حملے کیے اور 4 مرتبہ گیند کو جال میں پہنچایا۔ رانا وحید اور عبدالشاہد نے ایک، ایک گول کیا جبکہ ندیم احمد نے مزید 2 گول اسکور کرکے اپنی ہیٹ ٹرک مکمل کرلی۔

میچ کے آخری کوارٹر میں دونوں ٹیمیں کوئی گول نہ کرسکیں، تاہم پہلے 3 کوارٹرز میں پاکستان کی جانب سے کیے گئے 9 گول فیصلہ کن ثابت ہوئے اور قومی ٹیم نے مقابلہ 0-9 سے اپنے نام کرلیا۔

پاکستان کی جانب سے جارحانہ کھیل اور مسلسل گول اسکورنگ نے میچ کو مکمل طور پر یکطرفہ بنائے رکھا، جبکہ تھائی لینڈ کی ٹیم پورے مقابلے میں ایک بھی گول کرنے میں کامیاب نہ ہوسکی۔