حسبان میڈیا (ویب ڈیسک): محکمہ موسمیات نے خیبرپختونخوا، اسلام آباد، کشمیر، گلگت بلتستان اور ملک کے دیگر علاقوں میں آئندہ 24 گھنٹوں کے دوران بارش کی پیشگوئی کرتے ہوئے شہریوں کو محتاط رہنے کی ہدایت کردی۔
محکمہ موسمیات کے مطابق اسلام آباد اور گردونواح میں گرج چمک کے ساتھ بارش کا امکان ہے، جبکہ بعض مقامات پر موسلا دھار بارش، تیز ہواؤں اور ژالہ باری کی بھی توقع ہے۔
محکمہ موسمیات کا کہنا ہے کہ کشمیر، گلگت بلتستان اور خیبرپختونخوا کے مختلف علاقوں میں بھی بارشوں کا سلسلہ جاری رہ سکتا ہے، جبکہ بالائی علاقوں میں بارش اور گرج چمک کا موجودہ سلسلہ 18 ستمبر تک برقرار رہنے کا امکان ہے۔
موسمی نظام کے باعث شمالی علاقوں میں شدید بارشوں کے نتیجے میں لینڈ سلائیڈنگ اور اچانک سیلابی صورتحال پیدا ہونے کا خدشہ ظاہر کیا گیا ہے، جس کے پیش نظر متعلقہ اداروں اور شہریوں کو احتیاطی تدابیر اختیار کرنے کی ہدایت کی گئی ہے۔
محکمہ موسمیات نے شہریوں کو دریاؤں، ندی نالوں، انڈر پاسز اور نشیبی علاقوں کے قریب غیر ضروری نقل و حرکت سے گریز کرنے کا مشورہ دیا ہے، کیونکہ شدید بارش کے دوران پانی کی سطح میں اچانک اضافہ ہوسکتا ہے۔
شہریوں کو گرج چمک کے دوران غیر ضروری سفر سے اجتناب، بجلی کے کھمبوں، درختوں اور کمزور تعمیرات سے مناسب فاصلہ رکھنے کی بھی ہدایت کی گئی ہے۔
دوسری جانب پاکستان میٹرولوجیکل ڈیپارٹمنٹ کے فلڈ فورکاسٹنگ ڈویژن کے 16 ستمبر کے بلیٹن میں بڑے دریاؤں میں پانی کی صورتحال فی الحال کم سطح پر رپورٹ کی گئی تھی، تاہم محکمہ موسمیات نے آئندہ بارشوں کے تناظر میں موسم اور ممکنہ سیلابی صورتحال پر مسلسل نظر رکھنے پر زور دیا ہے۔
