حسبان میڈیا (ویب ڈیسک): سعودی عرب کی کم لاگت فضائی کمپنی فلائی ڈیل نے پاکستان اور سعودی عرب کے درمیان فضائی رابطوں کو مزید وسعت دیتے ہوئے مدینہ منورہ اور کراچی کے درمیان براہِ راست پروازوں کا آغاز کردیا ہے۔
نئی فضائی سروس کے تحت دونوں شہروں کے درمیان ہفتے میں 2 پروازیں چلائی جائیں گی۔ نئی سروس کی پہلی پرواز اتوار کو مدینہ منورہ سے روانہ ہوکر کراچی پہنچ گئی، جس کے ساتھ فلائی ڈیل کے پاکستان سے منسلک بین الاقوامی فضائی راستوں کی تعداد 7 ہوگئی ہے۔
فلائی ڈیل کی جانب سے کراچی روٹ کے لیے جدید ایئربس اے 320 نیو طیارے استعمال کیے جائیں گے۔ ہر طیارے میں 186 مسافروں کی گنجائش ہے جبکہ تمام نشستیں اکانومی کلاس پر مشتمل ہیں۔
مسافروں کی سہولت کے لیے طیاروں میں موبائل فون اور دیگر برقی آلات چارج کرنے کی سہولت بھی فراہم کی گئی ہے۔ اس کے علاوہ سامان رکھنے کے لیے کشادہ اوپری خانے اور سفر کو زیادہ آرام دہ بنانے کے لیے جدید روشنی کا نظام بھی موجود ہے۔
مدینہ منورہ سے کراچی کے لیے نئی پروازوں کے آغاز کے بعد مدینہ سعودی عرب کا دوسرا شہر بن گیا ہے جہاں سے فلائی ڈیل کی براہِ راست بین الاقوامی پرواز کے ذریعے کراچی پہنچا جاسکتا ہے۔ اس سے قبل ریاض اس فضائی رابطے کا اہم مرکز تھا۔
فلائی ڈیل نے گزشتہ سال پاکستان کی فضائی مارکیٹ میں قدم رکھا تھا اور اس وقت کمپنی کے پاکستان سے صرف 2 فضائی راستے منسلک تھے، تاہم مختصر عرصے میں ان کی تعداد بڑھ کر 7 ہوگئی ہے۔
پاکستان اولمپک ایسوسی ایشن کے سیکریٹری جنرل خالد محمود کے مطابق مدینہ منورہ اور کراچی کے درمیان نئی فضائی سروس دونوں ممالک کے درمیان سفری روابط مزید مضبوط بنانے کے ساتھ مسافروں کو سفر کا ایک اضافی اور سہل ذریعہ فراہم کرے گی۔
کمپنی کے مطابق پاکستان کے لیے نئی پروازیں فلائی ڈیل کی بین الاقوامی سطح پر توسیع کی حکمت عملی کا حصہ ہیں، جس کے تحت مختلف علاقائی منڈیوں میں فضائی نیٹ ورک کو مسلسل وسعت دی جارہی ہے۔
فلائی ڈیل نے سعودی وژن 2030 کے تحت بھی اپنے فضائی بیڑے اور بین الاقوامی نیٹ ورک کو بڑے پیمانے پر وسعت دینے کا منصوبہ بنا رکھا ہے۔ کمپنی کا ہدف 2030 تک موجودہ حجم کے مقابلے میں اپنے فضائی بیڑے اور نیٹ ورک کو 2 گنا سے زیادہ بڑھانا ہے۔
اس منصوبے کے تحت 2027 سے نئے ایئربس اے 321 نیو اور بڑے جسامت کے ایئربس اے 330-900 نیو طیارے بھی کمپنی کے موجودہ ایئربس اے 320 طیاروں کے بیڑے میں شامل کیے جانے کی توقع ہے۔
