حسبان میڈیا (ویب ڈیسک): وزیر اطلاعات خیبرپختونخوا شفیع جان نے اعلان کیا ہے کہ وزیراعلیٰ خیبرپختونخوا محمد سہیل آفریدی سندھ میں جاری پاکستان تحریک انصاف کی عوامی رابطہ مہم کے سلسلے میں آج حیدرآباد اور کراچی کا دورہ کریں گے، جہاں وہ مختلف مقامات پر پارٹی کارکنوں سے خطاب کریں گے۔

شفیع جان کے مطابق وزیراعلیٰ سہیل آفریدی پارٹی کارکنوں کی ایک بڑی ریلی کے ہمراہ مزار قائد کے قریب شاہراہ قائدین پہنچیں گے، جہاں وہ کارکنوں اور عوام سے خطاب کریں گے۔

وزیر اطلاعات نے سندھ میں جاری تحریک پر بات کرتے ہوئے دعویٰ کیا کہ عوام کی بڑی تعداد میں شرکت ملک میں ایک نئے سیاسی دور کی علامت ہے اور اس تحریک کو اب روکا نہیں جاسکتا۔

ان کا کہنا تھا کہ عمرکوٹ میں پاکستان تحریک انصاف کی سرگرمی کے دوران عوام کی غیر معمولی شرکت اس امر کا اظہار ہے کہ سندھ کے عوام تبدیلی کا فیصلہ کرچکے ہیں۔ شفیع جان نے دعویٰ کیا کہ مختلف شہروں میں عوام کے درمیان عمران خان کے لیے بھرپور حمایت، جوش اور وابستگی نمایاں طور پر دکھائی دے رہی ہے۔

انہوں نے کہا کہ کراچی کے عوام نے عام انتخابات میں پاکستان تحریک انصاف کو بھاری مینڈیٹ دیا تھا، تاہم ان کے بقول وفاق اور پنجاب کی طرح کراچی میں بھی عوامی مینڈیٹ کو تبدیل کیا گیا۔

شفیع جان نے الزام عائد کیا کہ فارم 47 کے ذریعے عوامی حمایت سے محروم حکمرانوں کو اقتدار میں لایا گیا، جبکہ عوامی مینڈیٹ کے بجائے اسی طریقہ کار کے ذریعے اقتدار حاصل کرنے والے وزرا قومی سانحات کے موقع پر بھی عوامی جذبات سے لاتعلق دکھائی دیتے ہیں۔

وزیر اطلاعات خیبرپختونخوا نے کراچی کی اہمیت اجاگر کرتے ہوئے کہا کہ یہ شہر ملکی معیشت کا مرکزی ستون ہے اور کراچی کی ترقی پاکستان کی مجموعی معاشی پیش رفت سے براہ راست منسلک ہے۔

ان کے مطابق کراچی کے دیرینہ مسائل محض سیاسی دعووں اور وعدوں سے حل نہیں ہوسکتے، بلکہ اس کے لیے حقیقی عوامی مینڈیٹ، مؤثر انتظامی نظام اور بہتر طرز حکمرانی ضروری ہے۔

شفیع جان نے دعویٰ کیا کہ کراچی سمیت وفاق اور پنجاب میں موجود حکمرانوں سے عوام کو جلد نجات ملے گی۔ انہوں نے کہا کہ پاکستان تحریک انصاف اپنی سیاسی جدوجہد جاری رکھے گی۔

وزیر اطلاعات کے مطابق 27 ستمبر کو اسلام آباد کی جانب ہونے والے لانگ مارچ میں لاکھوں افراد شرکت کریں گے، جبکہ تحریک کا بنیادی مقصد عمران خان کی رہائی اور عوامی مینڈیٹ کی واپسی کے لیے جدوجہد کو آگے بڑھانا ہے۔