سانگھڑ: پاکستان تحریک انصاف (پی ٹی آئی) کے مرکزی سیکرٹری جنرل سلمان اکرم راجا نے وفاقی وزیر داخلہ محسن نقوی کے نئے انتظامی یونٹس کے قیام سے متعلق بیان پر سخت ردعمل دیتے ہوئے کہا ہے کہ جب تک تحریک انصاف کے بانی عمران خان کی واضح رائے اور منظوری سامنے نہیں آ جاتی، پی ٹی آئی ایسے کسی بھی عمل کا حصہ نہیں بنے گی۔

سانگھڑ میں جیو نیوز سے خصوصی گفتگو کرتے ہوئے سلمان اکرم راجا نے وفاقی حکومت کے بیانیے کو یکسر مسترد کر دیا۔ جب ان سے سوال کیا گیا کہ وزیر داخلہ محسن نقوی کا دعویٰ ہے کہ نئے انتظامی یونٹس ہر صورت بن کر رہیں گے، تو انہوں نے دوٹوک الفاظ میں کہا کہ کسی بھی نئے صوبے یا انتظامی اکائی کی تشکیل کے لیے سب سے پہلے بانی پی ٹی آئی عمران خان کو سیاسی مکالمے کا حصہ بنانا ہوگا۔ انہوں نے واضح کیا کہ تحریک انصاف سندھ کے غیور عوام اور ان کے حقوق کے ساتھ مضبوطی سے کھڑی ہے اور صوبے کی تقسیم کے حوالے سے کسی بھی یکطرفہ فیصلے کو قبول نہیں کیا جائے گا۔

سلمان اکرم راجا نے موجودہ پارلیمنٹ کی آئینی حیثیت پر سنگین سوالات اٹھاتے ہوئے کہا کہ پی ٹی آئی اس موجودہ اسمبلی کو عوامی نمائندہ تسلیم نہیں کرتی کیونکہ یہ 'فارم 47' کی بنیاد پر وجود میں آئی ہے۔ انہوں نے یاد دلایا کہ تحریک انصاف نے 26 ویں اور 27 ویں آئینی ترامیم کو بھی تسلیم نہیں کیا تھا، اور موجودہ اسمبلی کو کسی بھی نئی آئینی ترمیم کا کوئی اخلاقی یا قانونی حق حاصل نہیں ہے۔ انہوں نے مطالبہ کیا کہ ملک میں نئے صوبوں کے قیام جیسے بڑے فیصلے سے قبل ملک میں شفاف انتخابات کا انعقاد کرایا جائے اور عوام کے حقیقی نمائندوں کو پارلیمنٹ میں لایا جائے، کیونکہ نئے انتظامی یونٹس کی تشکیل آئینی ترمیم کے بغیر ممکن نہیں۔