باجوڑ: محدود وسائل، مالی مشکلات اور مختلف رکاوٹوں کے باوجود باجوڑ سے تعلق رکھنے والے ہنرمند نوجوان سبحان اللہ نے اپنی 6 سالہ مسلسل محنت کے بعد اپنی مدد آپ کے تحت ہیلی کاپٹر تیار کرلیا، جس نے مقامی سطح پر شہریوں کی خاص توجہ حاصل کرلی ہے۔
سبحان اللہ اب اپنے تیار کردہ ہیلی کاپٹر کو آزمائشی مرحلے میں لے جانے کے لیے تیار ہیں۔ حکام کی جانب سے 6 ستمبر کو باجوڑ سپورٹس کمپلیکس میں اس کا عملی مظاہرہ کرانے کی اجازت دی گئی ہے، جبکہ کامیاب تجربے کی صورت میں ہیلی کاپٹر کو اڑانے کی اجازت دینے کا عندیہ بھی دیا گیا ہے۔
سبحان اللہ کا کہنا ہے کہ انہیں بچپن ہی سے مشینوں اور مختلف آلات کو کھولنے، سمجھنے اور انہیں دوبارہ تیار کرنے میں دلچسپی تھی۔ موٹرسائیکل مکینک کا کام سیکھنے کے بعد مشینری کے حوالے سے ان کا شوق مزید بڑھا اور اسی دلچسپی نے انہیں ہیلی کاپٹر تیار کرنے کے منفرد منصوبے کی طرف راغب کیا۔
انہوں نے محدود مالی وسائل کے باوجود ہمت نہ ہاری اور کئی برس تک مسلسل محنت کرکے اپنے خواب کو عملی شکل دینے کی کوشش جاری رکھی۔
سبحان اللہ کا تعلق ایک محنت کش گھرانے سے ہے۔ وہ موسم کے دوران پنجاب کے مختلف علاقوں میں چپل فروخت کرکے روزگار کماتے ہیں، جبکہ سال کے دیگر حصے میں دیہاڑی مزدوری کرکے اپنے اور خاندان کے اخراجات پورے کرتے ہیں۔
ان کا کہنا ہے کہ روزمرہ معاشی مشکلات کے باوجود انہوں نے ہیلی کاپٹر کی تیاری کا کام ترک نہیں کیا اور دستیاب وسائل کو استعمال کرتے ہوئے اس منصوبے کو آگے بڑھاتے رہے۔
ہیلی کاپٹر کی تیاری کے دوران مطلوبہ پرزہ جات اور دیگر سامان کے حصول کے لیے سبحان اللہ کو کئی مشکلات کا سامنا کرنا پڑا۔ ضروری سامان کی تلاش میں انہوں نے پشاور، تیمرگرہ، لاہور اور دیگر شہروں کے متعدد دورے کیے۔
6 سال کی محنت اور جدوجہد کے بعد تیار ہونے والے اس ہیلی کاپٹر کا اب عملی امتحان 6 ستمبر کو باجوڑ سپورٹس کمپلیکس میں ہوگا۔
حکام کے مطابق آزمائشی مظاہرے کے نتائج کا جائزہ لینے کے بعد ہی ہیلی کاپٹر کو باقاعدہ اڑان کی اجازت دینے سے متعلق فیصلہ کیا جائے گا، جبکہ سبحان اللہ اپنی کاوش کو عملی طور پر کامیاب ثابت کرنے کے لیے پرعزم ہیں۔
