حسبان میڈیا (ویب ڈیسک): پاکستان کرکٹ ٹیم کے سابق کپتان مصباح الحق نے پاکستان کرکٹ بورڈ کی سلیکشن کمیٹی سے علیحدگی اختیار کرلی، ذرائع کے مطابق کھلاڑیوں کے انتخاب کے معاملے پر مشاورت نہ ہونے پر انہوں نے استعفیٰ دے دیا۔
پاکستان کرکٹ بورڈ کی سلیکشن کمیٹی میں شامل سابق کپتان مصباح الحق نے اپنے عہدے سے استعفیٰ دے دیا ہے۔ ذرائع کے مطابق انہوں نے اپنا استعفیٰ ای میل کے ذریعے کرکٹ بورڈ کو ارسال کیا۔
ذرائع کا کہنا ہے کہ مصباح الحق کے استعفے کی بڑی وجہ کھلاڑیوں کے انتخاب سے متعلق اختلافات ہیں۔ انگلینڈ بھیجے جانے والے ان کھلاڑیوں کے انتخاب کے معاملے پر مبینہ طور پر مصباح الحق سے مشاورت نہیں کی گئی، جنہیں پہلے ڈراپ کیے گئے کھلاڑیوں کے متبادل کے طور پر ٹیم کے ساتھ بھیجا گیا۔
ذرائع کے مطابق فیصلے کے اہم مرحلے میں مصباح الحق کو اعتماد میں نہ لیے جانے پر انہوں نے اپنے تحفظات سے پاکستان کرکٹ بورڈ کو آگاہ کیا، جس کے بعد سلیکشن کمیٹی سے مستعفی ہونے کا فیصلہ کیا۔
مصباح الحق نے بعد ازاں اپنا استعفیٰ ای میل کے ذریعے بورڈ کو بھجوا دیا۔ تاہم پاکستان کرکٹ بورڈ کی جانب سے تاحال سابق کپتان کے استعفے کی تصدیق یا اس کی وجوہات کے حوالے سے کوئی باضابطہ مؤقف سامنے نہیں آیا۔
مصباح الحق رواں سال مارچ میں پاکستان کرکٹ بورڈ کی سلیکشن کمیٹی کا حصہ بنے تھے۔ ان کے ساتھ سابق کپتان سرفراز احمد کو بھی کمیٹی میں شامل کیا گیا تھا۔
ان کا استعفیٰ ایسے وقت میں سامنے آیا ہے جب پاکستان کرکٹ بورڈ قومی ٹیسٹ ٹیم کے سیٹ اپ میں تبدیلی اور تنظیم نو کے مرحلے سے گزر رہا ہے۔
قومی ٹیم اس وقت انگلینڈ کے خلاف سیریز کے آخری ٹیسٹ کی تیاریوں میں مصروف ہے۔ ایسے میں سلیکشن کمیٹی کے اہم رکن کی اچانک علیحدگی نے قومی ٹیم کے انتخاب اور آئندہ سلیکشن پالیسی سے متعلق سوالات کو مزید اہم بنا دیا ہے۔
ابھی یہ واضح نہیں کہ مصباح الحق کے استعفے کے بعد سلیکشن کمیٹی کی تشکیل میں کیا تبدیلی کی جائے گی اور قومی ٹیسٹ ٹیم کے آئندہ انتخاب کے معاملات کس طریقہ کار کے تحت آگے بڑھائے جائیں گے۔
