حسبان میڈیا (ویب ڈیسک): لوئر دیر میں جماعت اسلامی کے صوبائی امیر عنایت اللہ خان نے پیٹرولیم مصنوعات پر عائد لیوی کو عوام پر اضافی معاشی بوجھ قرار دیتے ہوئے حکومت سے فوری طور پر اسے ختم کرنے کا مطالبہ کردیا، مطالبات منظور نہ ہونے کی صورت میں حکومت کے خلاف گھیراؤ تحریک شروع کرنے کی دھمکی بھی دے دی۔
خیبرپختونخوا کے ضلع لوئر دیر میں جماعت اسلامی کے صوبائی امیر عنایت اللہ خان نے حکومت کی معاشی پالیسیوں اور پیٹرولیم مصنوعات پر عائد لیوی پر شدید تحفظات کا اظہار کیا ہے۔
ایک بیان میں عنایت اللہ خان نے کہا کہ حکومت کو پیٹرولیم مصنوعات پر لیوی کے نام پر عوام سے بھتہ وصول کرنے کا سلسلہ فوری طور پر بند کرنا چاہیے۔ ان کے مطابق مہنگائی اور غربت نے پہلے ہی عام شہریوں کی زندگی مشکل بنا رکھی ہے، ایسے میں پیٹرولیم مصنوعات پر مزید بوجھ ڈالنا عوام کے ساتھ زیادتی ہے۔
انہوں نے کہا کہ حکومت کو عوام کی مشکلات میں اضافہ کرنے کے بجائے انہیں ریلیف دینے کے لیے عملی اقدامات کرنے چاہییں۔ بڑھتی ہوئی مہنگائی کے باعث کم آمدن والے طبقے کے لیے روزمرہ ضروریات پوری کرنا بھی مشکل ہوتا جارہا ہے۔
عنایت اللہ خان نے حکومت کو خبردار کرتے ہوئے کہا کہ جماعت اسلامی پہلے مرحلے میں اپنے مطالبات منوانے کے لیے بھرپور کوشش کرے گی، تاہم اگر حکومت نے مطالبات تسلیم نہ کیے تو احتجاج کا دائرہ وسیع کرتے ہوئے حکومت کے خلاف گھیراؤ تحریک شروع کی جائے گی۔
جماعت اسلامی کے صوبائی امیر نے واضح کیا کہ عوام کو درپیش معاشی مشکلات کے خاتمے اور پیٹرولیم مصنوعات پر اضافی بوجھ کے خلاف ان کی جماعت اپنا احتجاج جاری رکھے گی۔
