حسبان میڈیا (ویب ڈیسک): آزاد جموں و کشمیر قانون ساز اسمبلی میں مخصوص نشستوں کے نتائج سامنے آنے کے بعد مسلم لیگ (ن) نے واضح عددی برتری حاصل کرلی ہے، جس کے بعد حکومت سازی کے لیے اس کی پوزیشن مزید مستحکم ہوگئی ہے۔

مخصوص نشستوں کے لیے ہونے والی پولنگ کے نتائج کے مطابق مسلم لیگ (ن) نے 8 میں سے 6 نشستیں اپنے نام کرلیں، جبکہ پیپلز پارٹی کو 2 نشستوں پر کامیابی حاصل ہوئی۔ ان نتائج کے بعد آزاد کشمیر اسمبلی میں مسلم لیگ (ن) کی حکومت بنانے کی راہ مزید ہموار ہوگئی ہے۔

ٹیکنوکریٹ کی مخصوص نشست پر مسلم لیگ (ن) کے امیدوار بیرسٹر افتخار گیلانی نے 26 ووٹ حاصل کرکے کامیابی حاصل کی، جبکہ پیپلز پارٹی کے امیدوار ذوالفقار علی کو 12 ووٹ ملے۔

اسی طرح علما و مشائخ کی نشست پر مسلم لیگ (ن) کے محمد مظہر سعید 26 ووٹ لے کر کامیاب قرار پائے، جبکہ پیپلز پارٹی کے امیدوار حافظ طارق نے 12 ووٹ حاصل کیے۔

خواتین کے لیے مختص 5 نشستوں میں سے مسلم لیگ (ن) نے 3 نشستیں حاصل کیں۔ کامیاب ہونے والی امیدواروں میں مریم زمان، مریم ادریس اور سحرش قمر شامل ہیں۔

خواتین کی باقی 2 مخصوص نشستوں پر پیپلز پارٹی کی فرزانہ یعقوب اور زوبیہ خورشید راجہ کامیاب رہیں۔

مخصوص نشستوں کے نتائج کے بعد مسلم لیگ (ن) کے ارکان کی تعداد 32 تک پہنچ گئی ہے، جبکہ پیپلز پارٹی کے ارکان کی تعداد 14 ہوگئی ہے۔ مسلم لیگ (ن) کے 25 بنیادی ووٹوں کے ساتھ اتحادیوں کی حمایت ملنے پر اس کے مجموعی ووٹ 26 تک پہنچنے کی بات بھی سامنے آئی ہے۔

دوسری جانب اوورسیز کشمیریوں کی مخصوص نشست پر عبدالرحمان آرائیں پہلے ہی بلامقابلہ رکن اسمبلی منتخب ہوچکے ہیں۔

مخصوص نشستوں کے نتائج مکمل ہونے کے بعد آزاد کشمیر قانون ساز اسمبلی کی تشکیل کا مرحلہ آگے بڑھ گیا ہے اور اب حکومت سازی کے بعد وزیراعظم کے انتخاب کی تیاریاں تیز کردی گئی ہیں۔

سیاسی حلقوں میں مسلم لیگ (ن) کی واضح عددی برتری کے باعث آئندہ حکومت اور وزیراعظم کے انتخاب کے حوالے سے بھی سرگرمیاں بڑھ گئی ہیں، جبکہ نئی حکومت کے قیام کا مرحلہ اب اسمبلی کی آئینی کارروائی کی جانب بڑھ رہا ہے۔