حسبان میڈیا (ویب ڈیسک): وزیر مملکت برائے داخلہ سینیٹر طلال چوہدری نے بانی پاکستان تحریک انصاف عمران خان کی صحت سے متعلق گردش کرنے والی خبروں کو مسترد کرتے ہوئے دعویٰ کیا ہے کہ وہ تندرست ہیں اور جیل میں ان کا باقاعدگی سے طبی معائنہ کیا جا رہا ہے۔

نجی ٹی وی پروگرام نیا پاکستان میں گفتگو کرتے ہوئے طلال چوہدری نے کہا کہ عمران خان کی طبیعت ٹھیک ہے اور جیل میں روزانہ 3 مرتبہ ان کا طبی معائنہ کیا جاتا ہے۔

انہوں نے کہا کہ اگر بانی پی ٹی آئی کو اسپتال منتقل کرنے کی واقعی ضرورت محسوس ہوئی تو اس کے لیے کسی عدالتی حکم کا انتظار نہیں کیا جائے گا، بلکہ متعلقہ حکام خود انہیں اسپتال منتقل کرنے کا فیصلہ کرسکتے ہیں۔

وزیر مملکت برائے داخلہ نے عمران خان کی بہنوں کی جانب سے طبی سہولیات سے متعلق مطالبات پر بھی ردعمل دیا۔ ان کا کہنا تھا کہ اگر عمران خان کی بہن اس معاملے کو بنیاد بنا کر کسی قسم کا این آر او حاصل کرنا چاہتی ہیں تو یہ ان کی ذاتی خواہش ہوسکتی ہے۔

طلال چوہدری نے مزید کہا کہ ان کے خیال میں مخالفین عوامی ہمدردی حاصل کرنے کے لیے ’’ہمدردی کارڈ‘‘ استعمال کرنا چاہتے ہیں، تاہم حکومت پر اس طرح کے بیانات کا کوئی اثر نہیں پڑے گا۔

انہوں نے اسپتال کے باہر جمع ہونے والے افراد کو بھی تنقید کا نشانہ بناتے ہوئے کہا کہ توہین عدالت کا معاملہ ان لوگوں کے ساتھ متعلق ہے جو اسپتال کے باہر جمع ہوئے تھے۔

وزیر مملکت نے عدالتی نظام کے حوالے سے کہا کہ موجودہ عدلیہ ماضی سے مختلف ہے اور اسے کسی قسم کا ’’جوڈیشل این آر او‘‘ دینے کے لیے استعمال نہیں کیا جا سکتا۔

طلال چوہدری کا کہنا تھا کہ مخالفین اپنی خواہشات کا اظہار کرتے رہیں، حکومت کو اس سے کوئی فرق نہیں پڑتا۔