اسلام آباد: حکومت اور اپوزیشن کے درمیان کافی عرصے بعد برف پگھلنا شروع ہوئی ہے اور حکومتی وزراء کی اپوزیشن رہنماؤں سے ملاقات ہوئی ہے۔
مسلم لیگ ن کی جانب سے رانا ثنااللہ ، طارق فضل چوہدری اور وزیر قانون اعظم نذیر تارڑ نے اپوزیشن چیمبر میں اپوزیشن لیڈر محمود اچکزئی سے ملاقات کی۔
سینیٹ میں اپوزیشن لیڈر راجہ ناصرعباس نے بھی ملاقات میں شرکت کی۔
ملاقات کے بعد رانا ثنااللہ نے پارلیمنٹ ہاؤس میں جیونیوز سے گفتگو کرتے ہوئے بتایا کہ محمود خان اچکزئی نے وزیراعظم کو خط لکھا تھا ، وزیراعظم اس خط کا جواب دے رہے ہیں، اسی معاملے پر مشاورت کے لیے محمودخان اچکزئی کے پاس آئے تھے۔
وفاقی وزیر طارق فضل چوہدری نے کہا ہے کہ اپوزیشن سے بات آگے بڑھ سکتی ہے، وزیراعظم شہباز شریف اپوزیشن کے خط کا جواب دیں گے، پیر والی ملاقات سے برف پگھلے گی اور معاملہ آگے چلے گا۔
انہوں نے کہا کہ بانی پی ٹی آئی عمران خان کی صحت پر کوئی کمپرومائز کیا نہ کیا جائے گا، انہیں پہلے سے بہتر طبّی سہولیات فراہم کی جائیں گی۔
اس کے علاوہ وفاقی وزیر طارق فضل چوہدری نے کہا کہ حکومت کے پاس نئے صوبوں سے متعلق ابھی کوئی تجویز نہیں۔
