حسبان میڈیا (ویب ڈیسک): پاکستان تحریک انصاف کے رہنما شیر افضل مروت نے پارٹی کی حالیہ احتجاجی سرگرمیوں میں اپنی عدم شرکت کی وجہ بتاتے ہوئے شکوہ کیا ہے کہ انہیں احتجاجی پروگراموں کے لیے دی جانے والی کالز میں شامل نہیں کیا جاتا، اس لیے وہ خود سے کسی احتجاج میں شریک ہونے کے قائل نہیں۔
اپنے ویڈیو پیغام میں شیر افضل مروت نے کہا کہ موجودہ صورتحال میں جس طرز عمل کا انہیں سامنا ہے، اس کے باعث ان کے لیے احتجاجی سرگرمیوں میں حصہ لینا ممکن نہیں۔
انہوں نے واضح الفاظ میں کہا کہ ان کی عادت نہیں کہ وہ کسی احتجاج میں بن بلائے پہنچ جائیں، اگر پارٹی کی جانب سے انہیں باقاعدہ طور پر شامل کیا جائے تو صورتحال مختلف ہوسکتی ہے۔
شیر افضل مروت کا کہنا تھا کہ اگر جمعرات کو ہونے والا احتجاج مؤثر ثابت ہوتا ہے اور شہر کے مختلف چوکوں پر بڑی تعداد میں کارکن موجود ہوتے ہیں تو اسے احتجاجی تحریک کی کامیابی کی علامت سمجھا جاسکتا ہے۔
انہوں نے کہا کہ ایسی صورت میں 27 ستمبر کو دی جانے والی ہڑتال کی کال کے کامیاب ہونے کے امکانات بھی بڑھ جائیں گے۔
پی ٹی آئی رہنما نے تاہم خبردار کیا کہ اگر جمعرات کا احتجاج بھی مطلوبہ نتائج حاصل نہ کرسکا اور اس کے بعد احتجاج کا کوئی واضح لائحہ عمل سامنے نہ آیا تو یہ تاثر مضبوط ہوگا کہ احتجاجی تحریک کو آگے بڑھانا قیادت کے لیے مشکل ہوتا جارہا ہے۔
شیر افضل مروت کے مطابق احتجاج کو نتیجہ خیز بنانے کے لیے صرف اعلانات کافی نہیں بلکہ واضح حکمت عملی، منظم تیاری اور عملی اقدامات بھی ضروری ہیں۔
