سیکرٹری محکمہ لائیو سٹاک اور ڈسٹرکٹ ڈائریکٹر لائیو سٹاک باجوڑ مختار احمد کے ہدایات کی روشنی میں ضلع باجوڑ کی تحصیل سلارزئی اور ماموند میں مویشیوں کو مختلف متعدی بیماریوں سے محفوظ رکھنے کے لیے ویکسینیشن مہم بھرپور انداز میں جاری ہے، جس کے دوران 10 سے زائد ٹیمیں مختلف علاقوں میں گھر گھر جا کر جانوروں کو حفاظتی ٹیکے لگا رہی ہیں۔

محکمہ لائیو سٹاک کے مطابق مہم کا مقصد مویشیوں میں پھیلنے والی متعدی بیماریوں کی روک تھام، بروقت حفاظتی اقدامات اور مال مویشی پالنے والے افراد کو بیماریوں سے متعلق آگاہی فراہم کرنا ہے۔مہم کے دوران متعلقہ اہلکاروں کو ہدایت کی گئی ہے کہ وہ شہریوں کو جانوروں کی بیماریوں سے بچاؤ اور ان کے پھیلاؤ کو روکنے کے لیے ضروری احتیاطی تدابیر سے بھی آگاہ کریں۔محکمے کی فیلڈ ٹیمیں روزانہ مقررہ علاقوں کا دورہ کر رہی ہیں اور زیادہ سے زیادہ مویشیوں کو ویکسین فراہم کرنے کے ساتھ ساتھ ویکسینیشن کا ریکارڈ بھی مرتب کر رہی ہیں۔حکام کے مطابق اب تک بڑی تعداد میں جانوروں کو حفاظتی ٹیکے لگائے جا چکے ہیں جبکہ مہم کو مقررہ اہداف کے حصول تک جاری رکھنے کے لیے فیلڈ سرگرمیاں مزید تیز کر دی گئی ہیں۔محکمہ لائیو سٹاک نے مویشی پال افراد سے اپیل کی ہے کہ وہ ویکسینیشن ٹیموں کے ساتھ تعاون کریں اور اپنے جانوروں کو بروقت حفاظتی ٹیکے لگوا کر انہیں خطرناک متعدی بیماریوں سے محفوظ بنائیں۔