حسبان میڈیا (ویب ڈیسک): قومی کرکٹ ٹیم کے آل راؤنڈر خوشدل شاہ نے پاکستان کرکٹ چھوڑ کر امریکا کی نمائندگی کرنے سے متعلق زیرِ گردش خبروں کو مسترد کرتے ہوئے انہیں بے بنیاد اور من گھڑت قرار دے دیا ہے۔

سوشل میڈیا پر گزشتہ کچھ عرصے سے یہ دعوے کیے جارہے تھے کہ خوشدل شاہ پاکستان کرکٹ سے علیحدگی اختیار کرکے امریکا کی جانب سے کھیلنے کا فیصلہ کرچکے ہیں۔ تاہم قومی آل راؤنڈر نے خود سامنے آکر ان خبروں کی تردید کردی۔

خوشدل شاہ نے سماجی رابطے کی ویب سائٹ ایکس پر جاری اپنے بیان میں کہا کہ پاکستان کرکٹ چھوڑنے سے متعلق پھیلائی جانے والی خبریں حقیقت پر مبنی نہیں۔

انہوں نے واضح کیا کہ پاکستان ان کا گھر ہے اور قومی ٹیم کی نمائندگی ان کے لیے ہمیشہ اولین ترجیح اور سب سے بڑا اعزاز رہی ہے۔

قومی کرکٹر نے مداحوں سے اپیل کی کہ وہ سوشل میڈیا پر گردش کرنے والی بے بنیاد اطلاعات پر یقین نہ کریں۔

خوشدل شاہ کا کہنا تھا کہ پاکستان کرکٹ کے ساتھ ان کی وابستگی میں نہ پہلے کوئی تبدیلی آئی ہے اور نہ مستقبل میں اس تعلق کو ختم کرنے کا کوئی ارادہ ہے۔

یوں آل راؤنڈر نے امریکا کی جانب سے کھیلنے اور پاکستان کرکٹ چھوڑنے سے متعلق تمام قیاس آرائیوں کو واضح طور پر مسترد کردیا ہے۔