حسبان میڈیا (ویب ڈیسک):پاکستان کے مایہ ناز اوپنر عبداللہ شفیق نے ویسٹ انڈیز کے خلاف دوسرے ٹیسٹ میچ میں شاندار اور ذمہ دارانہ بیٹنگ کا مظاہرہ کرتے ہوئے نہ صرف ٹیم کو مضبوط مجموعہ فراہم کیا بلکہ ایک ایسا ریکارڈ بھی اپنے نام کر لیا جو گزشتہ تقریباً نصف صدی سے برقرار تھا۔

میچ کے تیسرے روز پاکستان نے اپنی پہلی اننگز کا آغاز دو وکٹوں کے نقصان پر 266 رنز سے کیا، جہاں کپتان بابر اعظم 84 رنز اور عبداللہ شفیق 107 رنز کے ساتھ کریز پر موجود تھے۔ قومی ٹیم نے بعد ازاں 387 رنز بنا کر اپنی پہلی اننگز مکمل کی، جبکہ عبداللہ شفیق 160 رنز کی ناقابلِ شکست اننگز کھیل کر نمایاں رہے۔

عبداللہ شفیق کی یہ یادگار اننگز کئی حوالوں سے تاریخی ثابت ہوئی۔ وہ ویسٹ انڈیز کی سرزمین پر ٹیسٹ کرکٹ میں 150 سے زائد رنز بنانے والے 49 برس بعد پہلے پاکستانی بلے باز بن گئے۔ اس سے قبل 1977 میں ماجد خان نے گیانا میں 167 رنز کی اننگز کھیل کر یہ اعزاز حاصل کیا تھا۔

اعداد و شمار کے مطابق پاکستان کی جانب سے بیرونِ ملک ٹیسٹ کرکٹ میں 150 سے زائد رنز کی حالیہ چار بڑی اننگز میں سے تین عبداللہ شفیق کے نام ہیں، جو ان کی غیر معمولی کارکردگی اور مستقل مزاجی کا واضح ثبوت ہے۔

دوسری جانب ویسٹ انڈیز نے اپنی دوسری اننگز میں 6 وکٹوں کے نقصان پر 103 رنز بنا لیے ہیں اور اسے پاکستان پر 60 رنز کی مجموعی برتری حاصل ہو چکی ہے، جس کے باعث مقابلہ فیصلہ کن مرحلے میں داخل ہو گیا ہے۔