تم نے اسی سسٹم میں ساڑھے تین سال میں 30 سال کا سفر طے کیا، اب یہ خراب لگ رہا ہے؟ رانا ثناء اللہ کی وزیر داخلہ محسن نقوی پر کڑی تنقید

ہٹیاں بالا (آزاد کشمیر): وزیراعظم شہباز شریف کے مشیر برائے سیاسی امور اور مسلم لیگ (ن) کے سینئر رہنما رانا ثناء اللہ نے وفاقی وزیر داخلہ محسن نقوی اور پیپلز پارٹی کی قیادت کو شدید تنقید کا نشانہ بناتے ہوئے کہا ہے کہ موجودہ پارلیمانی جمہوری نظام قائد اعظم محمد علی جناح کا دیا ہوا ہے، جس کے خلاف کسی بھی قسم کی سازش یا منفی بیانیے کو قبول نہیں کیا جائے گا۔ آزاد کشمیر کے علاقے ہٹیاں بالا میں ایک عوامی جلسے سے خطاب کرتے ہوئے انہوں نے ملکی سیاسی نظام پر اٹھنے والے حالیہ سوالات کا ترکی بہ ترکی جواب دیا۔

رانا ثناء اللہ نے وزیر داخلہ محسن نقوی کے حالیہ بیان کا حوالہ دیتے ہوئے سخت برہمی کا اظہار کیا اور کہا کہ "اس سسٹم میں تم نے 30 سال کا سفر محض ساڑھے تین سال میں طے کر لیا، تم کہاں سے چلے تھے اور آج کہاں پہنچ گئے ہو؟" انہوں نے طنز کرتے ہوئے کہا کہ اتنی تیز رفتاری سے ترقی کے منازل طے کرنے کے بعد اب اچانک تمہیں آکر معلوم ہوا ہے کہ یہ سسٹم بالکل خراب ہو چکا ہے اور آگے چلنے کے قابل نہیں رہا؟ واضح رہے کہ گزشتہ دنوں محسن نقوی نے ملکی ترقی کے لیے نئے انتظامی یونٹس کو ناگزیر قرار دیتے ہوئے موجودہ نظام کو مکمل طور پر تباہ شدہ قرار دیا تھا۔

اپنے خطاب کے دوران رانا ثناء اللہ نے صدر آصف علی زرداری کے صاحبزادے اور پی پی پی قیادت پر بھی نشانہ سادھا۔ انہوں نے 'فارم 47' کے طعنوں پر جواب دیتے ہوئے سوال اٹھایا کہ اگر مسلم لیگ (ن) کے وزیراعظم کو ملنے والے ووٹ 'فارم 47' کے مرہونِ منت ہیں، تو پھر پیپلز پارٹی کے صدر نے جو ووٹ حاصل کیے، وہ کس فارم کے تحت شمار ہوئے تھے؟ انہوں نے قائدِ محترم نواز شریف کا دفاع کرتے ہوئے ماضی کی تاریخ کا حوالہ دیا اور کہا کہ قائد اعظم نے یہ ملک سیاسی جدوجہد کے ذریعے حاصل کیا تھا، جو لوگ مسلم لیگ پر دھاندلی کا الزام لگاتے ہیں انہیں یاد رکھنا چاہیے کہ اس ملک کی تاریخ میں کوئی پہلی بار ملک توڑنے کے بعد بھی وزیراعظم بنا تھا۔