پاکستان فٹبال میں نئی تاریخ رقم؛ قومی مینز ٹیم رواں سال انڈونیشیا میں شیڈول افتتاحی فیفا آسیان کپ میں پہلی بار ایکشن میں نظر آئے گی
لاہور (اسپورٹس رپورٹر،محمد عاصم ):
پاکستان فٹبال کے میدان سے ایک تاریخی اور انتہائی خوش آئند مژدہ سامنے آیا ہے۔ پاکستان فٹبال فیڈریشن (پی ایف ایف) نے قومی مینز فٹبال ٹیم کی رواں سال منعقد ہونے والے افتتاحی 'فیفا آسیان کپ' میں شرکت کی باضابطہ تصدیق کر دی ہے۔ یہ پہلا موقع ہے کہ پاکستان کی مینز فٹبال ٹیم اپنی تاریخ میں کسی بھی باقاعدہ فیفا ایونٹ کا حصہ بننے جا رہی ہے، جسے ملکی اسپورٹس کی تاریخ میں ایک شاندار پیش رفت قرار دیا جا رہا ہے۔
یہ باوقار ٹورنامنٹ رواں سال ستمبر اور اکتوبر کے مہینوں میں انڈونیشیا کی میزبانی میں کھیلا جائے گا۔ پاکستان فٹبال فیڈریشن کے مطابق، پاکستانی شاہین اس ایونٹ کے 'ٹاپ ٹائر' (اعلیٰ ترین درجے) میں مدمقابل ہوں گے۔ ٹورنامنٹ کے دوران پاکستان کا مقابلہ روایتی حریف بھارت سمیت ملائیشیا، سنگاپور، انڈونیشیا، فلپائن اور تھائی لینڈ جیسی مضبوط اور تجربہ کار ٹیموں سے ہوگا۔ پاکستان کا شمار ان تین مخصوص ممالک میں ہوتا ہے جنہیں فٹبال کی عالمی گورننگ باڈی کی جانب سے اس ایونٹ کے لیے خصوصی طور پر مدعو (وائلڈ کارڈ انٹری) کیا گیا ہے، جہاں تمام شریک ٹیموں کو دو مسابقتی گروپس میں تقسیم کیا جائے گا۔
پاکستان فٹبال فیڈریشن کے صدر سید محسن گیلانی نے اس موقع پر اپنے جوش و خروش کا اظہار کرتے ہوئے کہا کہ قومی ویمنز فٹبال ٹیم کی فیفا سیریز میں حالیہ کامیابیوں کے بعد اب قومی مینز ٹیم کا پہلے فیفا ایونٹ میں کوالیفائی کرنا ملکی فٹبال کے لیے ایک تاریخی سنگ میل ہے۔ انہوں نے مزید کہا کہ یہ انٹرنیشنل ٹورنامنٹ ہمارے کھلاڑیوں کو خطے کے مضبوط ترین حریفوں کے خلاف کھیلنے کا نایاب موقع فراہم کرے گا، جس سے نہ صرف ٹیم کے کھیل کا معیار بلند ہوگا بلکہ کھلاڑیوں کو بین الاقوامی سطح پر پاکستان کا نام روشن کرنے کا بہترین پلیٹ فارم بھی میسر آئے گا۔
