ویب ڈیسک: پاکستان کرکٹ بورڈ نے ویسٹ انڈیز کے خلاف جاری ٹیسٹ سیریز اور آئندہ انگلینڈ کے دورے کے لیے قومی ٹیسٹ اسکواڈ میں اہم تبدیلیوں کا اعلان کرتے ہوئے دو بیٹرز کو ٹیم کا حصہ بنا دیا ہے۔

قومی ٹیم اس وقت ویسٹ انڈیز کے دورے پر موجود ہے، جہاں دونوں ٹیموں کے درمیان دو ٹیسٹ میچوں کی سیریز کھیلی جا رہی ہے۔ پہلے ٹیسٹ کے دوران پاکستان کرکٹ بورڈ نے اسکواڈ میں ردوبدل کرتے ہوئے نئے کھلاڑیوں کی شمولیت کی تصدیق کر دی۔

بورڈ کے ترجمان کے مطابق اوپننگ بیٹر عبداللہ فضل انجری کے باعث ویسٹ انڈیز کے خلاف سیریز سے پہلے ہی دستبردار ہو چکے تھے، جس کے بعد ان کی جگہ عبداللہ شفیق کو قومی ٹیسٹ اسکواڈ میں شامل کر لیا گیا ہے۔

اسی کے ساتھ مڈل آرڈر کو مزید مستحکم بنانے کے لیے تجربہ کار بیٹر سعود شکیل کو بھی اضافی متبادل کے طور پر ٹیم میں شامل کیا گیا ہے، تاکہ آئندہ میچوں میں بیٹنگ لائن کو مزید مضبوط بنایا جا سکے۔

ویسٹ انڈیز کے خلاف سیریز مکمل ہونے کے بعد پاکستانی ٹیم انگلینڈ کا رخ کرے گی، جہاں تین ٹیسٹ میچوں پر مشتمل اہم سیریز کھیلی جائے گی۔ یہ مقابلے آئی سی سی ورلڈ ٹیسٹ چیمپئن شپ کے سلسلے کی اہم کڑی ہوں گے۔

پاکستان کرکٹ بورڈ کے مطابق عبداللہ فضل کمر کے نچلے حصے کی انجری کے باعث نہ صرف ویسٹ انڈیز بلکہ انگلینڈ کے خلاف پوری ٹیسٹ سیریز سے بھی باہر ہو گئے ہیں۔

ترجمان نے بتایا کہ کھلاڑی کو یہ انجری 23 جولائی کو ٹرینیڈاڈ میں واقع برائن لارا کرکٹ اکیڈمی میں ٹریننگ سیشن کے دوران پیش آئی۔ تکلیف کے بعد فوری طبی معائنہ اور ایم آر آئی اسکین کیا گیا، جس میں کمر کی انجری کی تصدیق ہوئی۔

پی سی بی کے میڈیکل پینل نے تفصیلی جائزے کے بعد سفارش کی کہ کھلاڑی کی مکمل صحت یابی کے لیے مناسب آرام اور بحالی ناگزیر ہے، اسی وجہ سے انہیں دونوں غیرملکی ٹیسٹ سیریز سے باہر رکھنے کا فیصلہ کیا گیا تاکہ وہ مکمل فٹ ہو کر دوبارہ قومی ٹیم کو دستیاب ہو سکیں۔