اسلام آباد  :  نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں شدید مون سون بارشوں، ندی نالوں میں طغیانی اور نشیبی علاقوں میں اربن فلڈنگ (شہری سیلاب) کے شدید خطرے کا الرٹ جاری کر دیا ہے۔ متعلقہ حکام کو ہائی الرٹ رہنے اور شہریوں کو محتاط رہنے کی ہدایات جاری کر دی گئی ہیں۔

تفصیلات کے مطابق این ڈی ایم اے کی جانب سے سوشل میڈیا پر جاری کردہ ایک ہنگامی بیان میں کہا گیا ہے کہ ایک طاقتور اور شدید مغربی ہواؤں کا سلسلہ مون سون کے ساتھ مل کر 20 سے 23 جولائی تک ملک کے بالائی اور شمالی حصوں کو شدید متاثر کرے گا۔ اس موسمیاتی نظام کے تحت گلگت بلتستان، خیبر پختونخوا، آزاد کشمیر اور بالائی پنجاب میں بعض مقامات پر موسلا دھار اور غیر معمولی بارشوں کا قوی امکان ہے۔

ترجمان این ڈی ایم اے کے مطابق اس شدید موسمی صورتحال کے باعث گلگت بلتستان، خیبر پختونخوا، آزاد کشمیر اور شمالی بالائی پنجاب کے پہاڑی سلسلوں میں فلیش فلڈنگ (اچانک سیلاب) اور ہل ٹورنٹس (پہاڑی ریلوں) میں طغیانی کا سنگین خدشہ موجود ہے۔ مزید برآں، دریائے چناب (مارالہ کے مقام پر) اور دریائے جہلم (منگلا کے بالائی حصوں) میں بڑے سیلابی ریلوں کی آمد متوقع ہے۔ اتھارٹی نے مقامی انتظامیہ کو دریاؤں کے قریبی علاقوں اور نشیبی آبادیوں کو محفوظ مقامات پر منتقل کرنے اور ہنگامی صورتحال سے نمٹنے کے لیے الرٹ رہنے کی تاکید کی ہے۔