اسلام آباد: محکمہ موسمیات نے ملک کے مختلف حصوں میں مون سون بارشوں کے نئے سلسلے کی پیشگوئی کرتے ہوئے خیبرپختونخوا، کشمیر، گلگت بلتستان اور دیگر بالائی علاقوں کے لیے الرٹ جاری کر دیا ہے۔ حکام نے خبردار کیا ہے کہ آئندہ چند روز کے دوران کہیں موسلادھار بارش، کہیں پہاڑی ندی نالوں میں طغیانی اور بعض علاقوں میں لینڈ سلائیڈنگ کے خدشات موجود ہیں۔
صوبائی ڈیزاسٹر مینجمنٹ اتھارٹی نے خیبرپختونخوا میں انیس سے تئیس جولائی تک شدید بارشوں کے امکان کے پیش نظر تمام متعلقہ اداروں کو الرٹ رہنے کی ہدایت جاری کر دی ہے۔ ادارے کے مطابق چترال، اپر اور لوئر دیر، سوات، شانگلہ، کوہستان، مانسہرہ اور ایبٹ آباد کے پہاڑی علاقوں میں لینڈ سلائیڈنگ کا خطرہ ہے، جبکہ پہاڑی ندی نالوں میں اچانک طغیانی اور سیلابی ریلوں کا بھی خدشہ ظاہر کیا گیا ہے۔
پی ڈی ایم اے کے مطابق پشاور، چارسدہ، نوشہرہ، مردان اور صوابی سمیت متعدد میدانی اضلاع میں شہری سیلاب کی صورتحال پیدا ہو سکتی ہے، جبکہ سوات اور ایبٹ آباد کے نشیبی علاقوں میں بھی بارش کا پانی جمع ہونے کا امکان ہے۔ ضلعی انتظامیہ، ریسکیو ایک ہزار ایک سو بائیس اور دیگر متعلقہ اداروں کو ہنگامی صورتحال سے نمٹنے کے لیے تیار رہنے کی ہدایات دی گئی ہیں۔
محکمہ موسمیات کے مطابق آج خیبرپختونخوا کے بیشتر اضلاع میں موسم گرم اور خشک رہنے کا امکان ہے، تاہم میدانی علاقوں میں گرمی اور حبس کی شدت برقرار رہے گی۔ اس دوران ہزارہ اور ملاکنڈ ڈویژن کے بعض علاقوں میں گرج چمک کے ساتھ بارش متوقع ہے۔
سرکاری اعداد و شمار کے مطابق پشاور میں درجہ حرارت تینتیس ڈگری سینٹی گریڈ ریکارڈ کیا گیا جبکہ ہوا میں نمی کا تناسب ترپن فیصد رہا۔ چترال میں بیس، دیر میں بائیس، مالم جبہ میں چوبیس، سیدو شریف میں ستائیس، بنوں میں چونتیس، ڈیرہ اسماعیل خان میں تینتیس اور ایبٹ آباد میں ستائیس ڈگری سینٹی گریڈ ریکارڈ کیا گیا۔
محکمہ موسمیات نے ملک کے دیگر حصوں کے لیے بھی بارشوں کی پیشگوئی کی ہے۔ کشمیر میں اٹھارہ سے پچیس جولائی تک وقفے وقفے سے بارش کا امکان ہے، جبکہ اسلام آباد، راولپنڈی، مری، گلیات اور پنجاب کے مختلف علاقوں میں انیس سے تئیس جولائی کے دوران بارشیں متوقع ہیں۔ پنجاب کے دیگر علاقوں میں بھی بیس سے چوبیس جولائی تک بارشوں کا سلسلہ جاری رہنے کی توقع ہے۔ گلگت بلتستان میں بھی اٹھارہ سے پچیس جولائی تک گرج چمک کے ساتھ بارش کی پیشگوئی کی گئی ہے۔
محکمہ موسمیات کے مطابق بلوچستان میں انیس سے تئیس جولائی اور تھرپارکر میں بیس سے چوبیس جولائی کے دوران بارش متوقع ہے، جبکہ سندھ کے بیشتر علاقوں میں شدید گرمی اور حبس برقرار رہنے کا امکان ظاہر کیا گیا ہے۔
ادھر مون سون بارشوں کے باعث تربیلہ ڈیم میں پانی کی آمد مسلسل بڑھ رہی ہے۔ انتظامیہ کے مطابق ڈیم میں پانی کی سطح ایک ہزار پانچ سو پانچ اعشاریہ گیارہ فٹ تک پہنچ گئی ہے۔ پانی کے بہاؤ میں اضافے کے پیش نظر آج صبح گیارہ بجے ڈیم کے اسپل ویز کھول دیے گئے، جس کے بعد پانی کے اخراج میں نمایاں اضافہ متوقع ہے۔
انتظامیہ کا کہنا ہے کہ ڈیم سے دو لاکھ بیس ہزار سے دو لاکھ تیس ہزار کیوسک تک پانی چھوڑا جا سکتا ہے۔ اسسٹنٹ کمشنر غازی جنید آفتاب نے شہریوں سے اپیل کی ہے کہ وہ احتیاطی تدابیر اختیار کریں، دریا اور برساتی نالوں کے قریب جانے سے گریز کریں، جبکہ نہانے، کشتی رانی اور ماہی گیری جیسی سرگرمیوں سے بھی اجتناب کریں تاکہ کسی بھی ممکنہ حادثے سے محفوظ رہا جا سکے۔
