ٹیکسلا: پنجاب کے شہر ٹیکسلا میں مبینہ طور پر غیرت کے نام پر ایک نوجوان جوڑے کو زبردستی زہر پلانے کا لرزہ خیز واقعہ سامنے آیا ہے، جس کے نتیجے میں نوبیاہتا نوجوان جاں بحق جبکہ اس کی اہلیہ شدید تشویشناک حالت میں ہسپتال منتقل کر دی گئی ہیں۔ پولیس کے مطابق، متاثرہ جوڑے نے تقریباً تین ماہ قبل پسند کی شادی کی تھی۔

تفصیلات کے مطابق، پولیس کو واقعے کی اطلاع ملتے ہی جب ٹیم موقع پر پہنچی تو ملزمان نے گرفتاری سے بچنے کے لیے پولیس اہلکاروں پر اندھا دھند فائرنگ کر دی۔ پولیس کی جوابی کارروائی اور مقابلے کے بعد ایک ملزم زخمی حالت میں پکڑا گیا، جبکہ مجموعی طور پر چار ملزمان کو گرفتار کر کے ان کے قبضے سے واردات میں استعمال ہونے والا اسلحہ بھی برآمد کر لیا گیا ہے۔ مقتول نوجوان کی شناخت افضل کے نام سے ہوئی ہے جو موقع پر ہی دم توڑ گیا تھا۔

پولیس حکام کا کہنا ہے کہ جب نفری جائے وقوعہ پر پہنچی تو دونوں میاں بیوی نیم بے ہوشی کی حالت میں پائے گئے تھے۔ خاتون کو فوری طور پر طبی امداد کے لیے قریبی ہسپتال منتقل کیا گیا جہاں ان کی حالت نازک بتائی جاتی ہے۔ پولیس نے واقعے کی ابتدائی تحقیقات شروع کر دی ہیں اور ملزمان کے خلاف اقدامِ قتل، قتل اور پولیس پر فائرنگ سمیت مختلف سنگین دفعات کے تحت مقدمہ درج کر لیا گیا ہے۔