اسلام آباد: وفاقی حکومت نے سوشل میڈیا پلیٹ فارمز پر پاک فوج اور ریاستی اداروں کے خلاف منفی پروپیگنڈا اور نازیبا مہم چلانے والے عناصر کے خلاف ایک بڑے اور منظم کریک ڈاؤن کی تیاری مکمل کر لی ہے۔ وزیرِ اعظم کے کوآرڈینیٹر اور مسلم لیگ (ن) کے رہنما اختیار ولی خان نے انکشاف کیا ہے کہ یوٹیوب پر ہرزہ سرائی کرنے اور سماجی رابطے کی ویب سائٹ ایکس (سابقہ ٹوئٹر) پر فیلڈ مارشل، پاک فوج اور اس کی مقدس وردی کے خلاف مہم چلانے والے تمام افراد کا ڈیٹا مکمل طور پر اکٹھا کر لیا گیا ہے۔
میڈیا سے گفتگو کرتے ہوئے وزیرِ اعظم کے کوآرڈینیٹر اختیار ولی نے دعویٰ کیا کہ اداروں کو نشانہ بنانے والے ان عناصر کو قانون کے کٹہرے میں لانے کے لیے تمام ڈیجیٹل شواہد اور ریکارڈ مرتب کر لیا گیا ہے۔ انہوں نے واضح الفاظ میں الٹی میٹم دیتے ہوئے کہا کہ ایسے تمام قانون شکن افراد کے خلاف آئندہ ایک ہفتے کے اندر زمین پر عملی کارروائی ہوتی ہوئی نظر آئے گی۔ حکومتی ذرائع کے مطابق، اس کریک ڈاؤن کا مقصد ڈیجیٹل دہشت گردی کا خاتمہ اور ملکی سلامتی کے ضامن اداروں کے وقار کو مجروح ہونے سے بچانا ہے۔
