پارٹی ڈسپلن کی خلاف ورزی پر سخت ایکشن: پی ٹی آئی نے ایم این اے اقبال آفریدی کی پارلیمانی پارٹی رکنیت معطل کر دی

اسلام آباد / دیر بالا (خصوصی رپورٹر): پاکستان تحریکِ انصاف کی پارلیمانی پارٹی نے ضابطہ اخلاق اور پارٹی نظم و ضبط کی سنگین خلاف ورزی پر سخت تادیبی کارروائی کرتے ہوئے رکنِ قومی اسمبلی اقبال آفریدی کی پارلیمانی پارٹی رکنیت فوری طور پر معطل کر دی ہے۔ یہ فیصلہ بیرسٹر گوہر علی خان کی زیرِ صدارت منعقدہ پارلیمانی پارٹی کے اہم اجلاس میں کیا گیا، جہاں اراکین نے ساتھی رکنِ قومی اسمبلی صاحبزادہ صبغت اللہ کے ساتھ پیش آنے والے مبینہ بدتمیزی اور نامناسب رویے کے واقعے کی شدید الفاظ میں مذمت کی۔

ذرائع کے مطابق، قومی اسمبلی کے بجٹ اجلاس کے بعد منعقدہ اس ہنگامی اجلاس میں اڈیالہ جیل کے باہر تحریکِ انصاف کے وفد کے دورے کے دوران پیش آنے والے افسوسناک واقعے پر تفصیلی غور کیا گیا۔ اجلاس کے شرکاء نے اقبال آفریدی کے طرزِ عمل پر شدید تحفظات کا اظہار کرتے ہوئے ایک متفقہ قرارداد منظور کی۔ قرارداد میں واضح کیا گیا کہ ایسا کوئی بھی رویہ جو پارٹی کے وقار، اندرونی اتحاد اور جمہوری اقدار کے منافی ہو، اسے کسی صورت برداشت نہیں کیا جائے گا۔

حسبان میڈیا کو موصول ہونے والی اطلاعات کے مطابق، اس مبینہ تلخ کلامی اور بدتمیزی کی ویڈیو سوشل میڈیا پر وائرل ہونے کے بعد ملک بھر کے سیاسی حلقوں اور عوامی سطح پر ایک نئی بحث چھڑ گئی تھی، جس سے پارٹی قیادت پر تادیبی کارروائی کے لیے دباؤ بڑھا۔ اجلاس میں موجود بعض اراکین کی جانب سے اقبال آفریدی کو مستقل طور پر پارٹی سے خارج کرنے کا مطالبہ بھی سامنے آیا ہے، جس کے بعد ذرائع نے تصدیق کی ہے کہ معاملے پر مزید سخت تادیبی کارروائی بھی زیرِ غور ہے۔