بوسٹن: فیفا فٹبال ورلڈ کپ کے گروپ سی کے اہم مقابلے میں مراکش نے شاندار کارکردگی کا مظاہرہ کرتے ہوئے اسکاٹ لینڈ کو ایک کے مقابلے میں صفر سے شکست دے دی اور ایونٹ میں اپنی پہلی کامیابی سمیٹ لی۔
میچ کے آغاز کے ساتھ ہی مراکش نے جارحانہ انداز اپنایا اور کھیل کے صرف اکہتر ویں سیکنڈ میں سائبری نے گیند جال میں پہنچا کر اپنی ٹیم کو برتری دلا دی۔ یہ گول نہ صرف میچ کا پہلا بلکہ فیصلہ کن گول ثابت ہوا۔
ابتدائی برتری کے بعد مراکش کے کھلاڑی مسلسل حملے کرتے رہے اور اسکور میں اضافہ کرنے کی کوشش کرتے رہے، جبکہ اسکاٹ لینڈ کی ٹیم گول برابر کرنے کے لیے جدوجہد کرتی رہی۔ تاہم پہلے ہاف کے اختتام تک مراکش کو ایک صفر کی سبقت حاصل رہی۔
دوسرے ہاف میں اسکاٹ لینڈ نے زیادہ بہتر کھیل پیش کیا اور متعدد مواقع بھی پیدا کیے۔ ٹیم کی پاسنگ اور حملے پہلے ہاف کے مقابلے میں زیادہ مؤثر دکھائی دیے، لیکن فارورڈ کھلاڑی کسی بھی موقع کو گول میں تبدیل نہ کر سکے۔
میچ کے اختتام پر مراکش نے ایک صفر سے کامیابی اپنے نام کر کے گروپ میں تین اہم پوائنٹس حاصل کر لیے، جس سے اس کی اگلے مرحلے تک رسائی کی امیدیں مزید روشن ہو گئی ہیں۔
دوسری جانب شکست کے باوجود اسکاٹ لینڈ کی ٹیم کے لیے ٹورنامنٹ کے دروازے بند نہیں ہوئے اور اس کے اگلے مرحلے میں پہنچنے کے امکانات اب بھی برقرار ہیں۔
