چارسدہ: 'شہیدِ اسلام مولانا شیخ ادریس کانفرنس' کی تمام تیاریاں مکمل، مولانا فضل الرحمن آئندہ کی سیاسی حکمتِ عملی کا اعلان کریں گے

چارسدہ   – جمعیت علمائے اسلام (جے یو آئی) کے زیراہتمام چارسدہ میں منعقد ہونے والی تاریخی 'شہیدِ اسلام مولانا شیخ ادریس شہید کانفرنس' کے لیے تمام انتظامات اور تیاریاں مکمل کر لی گئی ہیں اور پنڈال کو حتمی طور پر سجا دیا گیا ہے۔

ذرائع کے مطابق اس عظیم الشان اور مرکزی کانفرنس میں ملک بھر بالخصوص خیبر پختونخوا سے لاکھوں عقیدت مندوں اور پارٹی کارکنان کی آمد متوقع ہے۔ پنڈال میں شرکاء کے بیٹھنے کے لیے وسیع انتظامات کیے گئے ہیں جبکہ پنڈال اور اطراف کے راستوں کو پارٹی پرچموں اور بینرز سے سجا دیا گیا ہے۔ انتظامیہ کی جانب سے سیکیورٹی کے سخت ترین اقدامات کیے گئے ہیں اور رضاکاروں سمیت بھاری نفری تعینات کر دی گئی ہے۔

کانفرنس کے منتظمین کا کہنا ہے کہ جمعیت علمائے اسلام کے سربراہ مولانا فضل الرحمن اس اجتماع سے خصوصی اور کلیدی خطاب کریں گے۔ سیاسی پنڈتوں کے مطابق ملک کی موجودہ سیاسی صورتحال کے تناظر میں یہ خطاب انتہائی اہمیت کا حامل ہے، جس میں مولانا فضل الرحمن پارٹی کے آئندہ کے لائحہ عمل اور مستقبل کی سیاسی حکمتِ عملی کا باقاعدہ اعلان بھی کریں گے۔