پشاور: خیبرپختونخوا، بالخصوص صوبائی دارالحکومت پشاور میں دل کے امراض میں تشویشناک اضافہ ریکارڈ کیا جا رہا ہے، جہاں روزانہ بڑی تعداد میں افراد دل کے دوروں اور دیگر قلبی مسائل کے باعث اسپتالوں کا رخ کر رہے ہیں۔

طبی ذرائع کے مطابق پشاور کے سرکاری اور نجی اسپتالوں میں روزانہ دل کے امراض میں مبتلا درجنوں مریض علاج اور معائنے کے لیے پہنچ رہے ہیں۔ ماہرین کا کہنا ہے کہ روزانہ 10 سے 50 افراد تک دل کے دورے کا شکار ہو رہے ہیں، جس سے صورتحال کی سنگینی کا اندازہ لگایا جا سکتا ہے۔

شہر کے بڑے طبی مراکز، بشمول دل کے امراض کے خصوصی اسپتال اور دیگر اہم سرکاری و نجی ہسپتالوں میں قلبی امراض کے مریضوں کا رش مسلسل بڑھ رہا ہے۔ تشویشناک امر یہ ہے کہ نوجوان نسل بھی تیزی سے اس بیماری کی لپیٹ میں آ رہی ہے۔

ماہرینِ صحت کے مطابق نوجوانوں میں قبل از وقت دل کے دوروں کی بڑی وجوہات میں سگریٹ نوشی، ذیابیطس، موٹاپا، خون میں کولیسٹرول کی زیادتی، ہائی بلڈ پریشر اور جسمانی سرگرمیوں کی کمی شامل ہیں۔ ان کا کہنا ہے کہ غیر متوازن طرزِ زندگی اور ورزش سے دوری دل کے امراض کے خطرات میں نمایاں اضافہ کر رہی ہے۔

طبی ماہرین نے خبردار کیا ہے کہ اگر احتیاطی تدابیر اختیار نہ کی گئیں تو آئندہ برسوں میں دل کے امراض ایک بڑے صحت عامہ کے بحران کی شکل اختیار کر سکتے ہیں۔ انہوں نے عوام پر زور دیا ہے کہ متوازن غذا، باقاعدہ ورزش، تمباکو نوشی سے اجتناب اور معمول کے طبی معائنے کو اپنی روزمرہ زندگی کا حصہ بنائیں تاکہ اس مہلک بیماری سے بچا جا سکے۔

ماہرین کے مطابق پاکستان میں کم عمری میں شریانوں کی بیماریوں اور دل کے دوروں کے بڑھتے ہوئے رجحان پر فوری توجہ دینے کی ضرورت ہے، کیونکہ یہ مسئلہ نہ صرف افراد بلکہ مجموعی صحت کے نظام کے لیے بھی ایک بڑا چیلنج بنتا جا رہا ہے۔