اسلام آباد: ملک کے مختلف حصوں میں تیز ہواؤں، گرد آلود طوفانوں اور بارشوں نے شدید گرمی کی لہر کا خاتمہ کر دیا، تاہم خراب موسم کے باعث متعدد علاقوں میں حادثات اور بجلی کی بندش کی اطلاعات بھی موصول ہوئی ہیں۔
رپورٹس کے مطابق خیبرپختونخوا کے مختلف اضلاع میں تیز آندھی اور طوفانی ہواؤں کے باعث پیش آنے والے مختلف واقعات میں 20 سے زائد افراد زخمی ہوگئے۔ امدادی ادارے متاثرہ علاقوں میں صورتحال کا جائزہ لے رہے ہیں۔
سندھ کے مختلف شہروں میں بھی موسم نے اچانک رخ بدلا۔ تھرپارکر میں بارش ریکارڈ کی گئی جبکہ سکھر میں ژالہ باری ہوئی۔ لاڑکانہ، حیدرآباد، مٹیاری، ہالہ، نیو سعیدآباد، شکارپور اور کندھ کوٹ میں گرد آلود طوفانوں نے معمولاتِ زندگی کو متاثر کیا اور کئی مقامات پر آمدورفت میں مشکلات پیش آئیں۔
پنجاب اور وفاقی دارالحکومت میں بھی بارش کا سلسلہ جاری رہا۔ لاہور، اسلام آباد، جہلم، سرگودھا، گجرات، رحیم یار خان اور چنیوٹ سمیت متعدد شہروں میں بارش کے بعد موسم خوشگوار ہو گیا اور درجہ حرارت میں نمایاں کمی ریکارڈ کی گئی۔
ادھر لوئر کرم میں شدید ہواؤں کے باعث بجلی کی مرکزی ترسیلی لائن کا ایک ٹاور گر گیا، جس کے نتیجے میں پاراچنار، ملحقہ علاقوں اور پاک افغان سرحد سے متصل کئی دیہات بجلی سے محروم ہوگئے۔ متعلقہ حکام کے مطابق بجلی کی بحالی کے لیے مرمتی کام جاری ہے۔
محکمہ موسمیات نے آئندہ چند روز کے دوران ملک کے مختلف علاقوں میں مزید بارشوں اور تیز ہواؤں کی پیش گوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
