خیبرپختونخوا حکومت کے عوامی ایجنڈا کے تحت اور ڈپٹی کمشنر باجوڑ جناب شاہد علی خان کی ہدایات پر ڈسٹرکٹ یوتھ آفس باجوڑ کی جانب سے گورنمنٹ کالج برائے ٹیکنالوجی میں مفت ای کامرس کورس کا باقاعدہ آغاز افتتاحی تقریب اور اورینٹیشن سیشن کے ذریعے کیا گیا۔

تقریب میں ٹریننگ کے لیے منتخب نوجوانوں نے شرکت کی، جنہیں ڈسٹرکٹ یوتھ آفیسر باجوڑ اور ٹرینرز کی جانب سے کورس کے حوالے سے آگاہی اور رہنمائی فراہم کی گئی۔

ٹریننگ کے لیے 600 امیدواروں نے درخواستیں جمع کرائی تھیں، جن میں سے 60 امیدواروں کو اسکرونٹی، تعلیمی اسناد اور انٹرویو کی بنیاد پر منتخب کیا گیا۔

یہ ٹریننگ خیبرپختونخوا حکومت کے احکامات اور ڈپٹی کمشنر باجوڑ کی خصوصی دلچسپی کے تحت شروع کیے گئے اسکل ڈویلپمنٹ پروگرام کا حصہ ہے۔ اس پروگرام کے تحت موبائل ریپیرنگ ٹریننگ پہلے سے جاری ہے، جہاں 25 منتخب امیدواروں کو ایک ماہ تک تربیت فراہم کی جائے گی تاکہ وہ باقاعدہ روزگار شروع کرنے کے قابل بن سکیں۔

صوبائی حکومت اور ضلعی انتظامیہ، ضلعی دفتر برائے امورِ نوجوانان کے ذریعے نوجوانوں کی بہبود، ترقی اور ان کی صلاحیتوں کو نکھارنے کے لیے کوشاں ہیں۔ جاری اسکل ڈویلپمنٹ اور ٹریننگ پروگرام اسی سلسلے کی ایک کڑی ہے، جس کو مزید وسعت دینے کے لیے انتظامیہ بھرپور اقدامات کرے گی